Wednesday, February 29, 2012

قالك نسيم .. غلبان إنت يا منير

 تخيل معايا كدة إنك قاعد بتسمع لما النسيم بيعدي بين شعرك حبيبتي و إسرح في اجمل بنت شافتها عينك سواء تعرفها او متعرفهاش... ها تخيلتها ؟ طيب انا عايزاك تنساها خالص اه و الله إمحيها كدة عشان هحكيلك على حاجة احلى .

هحكيلكم على حمام البنات بتاع الكلية ! تان تان تاااااااااااااااااااان

اول حاجة انا مدخلتش الحمام غير مرات معدودة عالصوابع علشان علطول زحمة إلا في ايام الامتحانات لو كان حالفك الحظ و طلعت قبل ما الإمتحان ما ينتهي بساعة إلا ربع و برضه هتلاقي بنات جوة بس مش هيبقى زحمة .

اول حاجة و انت داخل هتحس بهبو البرفانات التركيبة اللي صحيا مينفعش تشمها مع بعض بس عادي معلش تغاضى عنها عشان خاطري و كمل طريقك جوة طبعا كل ده متناسق مع ميكس " اللهم ارزقنا فيما اعطيت" مع "إتقي ربنا فيا بزيادة حس بيا" ... هتلاقي بنات مرمية عالارض , ليه و بيعملوا إيه ؟ معرفش ده نفس سؤالي بقالي تلات سنين .. بس هما على حطة إيدك من اول يوم كلية .

طبعا عايز تقف قدام المراية .. إستحالة , بس نفرض إنك وقفت قدامها .. هتلاقي واحدة جنبك بتقولك "و النبي أختي معاكي روجاجو عشان لونه عاجبني اللي انتي حطاه ده" .. انت شخص ذوق ف هتدهولها بس اوعى تفتكر ان خلاص كدة لأن الطلب اللي بعديه علطول " يقطعني .. بصي اصل انا وشي فيه حبوب و الفرشة بتاعتي بتضايقني ممكن فرشتك عشان شكلها ناعمة ؟ متقلقيش مش معدي" فأنت ذوق برضه بس هتدهالها ليها خالص ..

هتبص جنبك .. ياريتك ما بصيت جنبك , هتلاقي واحدة لابسة عباية بس بقالها ساعتين بتحاول تبين القٌصة إزاي من برة الطرحة .. تقولها طلعيها و خلاص .. تقولك لأ طبعا لازم حتة معينة عشان حرام .. إتأثرت ؟ بس لو ركزت وراك هتتأثر اكتر من قدرة البت اللي وراك على تمثيل دور الصاحية من النوم على صاحبها و إنها في البيت ...

عايز بقى تعمل زي ما الناس بتعمل .. و يا سيدي انت مرزق و هتدخل بعد اللي جوة .. دخلت عارف هتلاقي إيه ؟ هتلاقي بواقي كي كي جوة... اي و الله , هتضطر تستنى ربع ساعة السيفون يتملى عشان تعرف تشده تاني .. قعدت بقى هتلاقي مناديل و حاجات تانية مش ولا بد و حاجات إظهر و حاجات إختفي .

إيه فرحت بالعالم اللي طول عمره مثير بالنسبالك ؟ محبتش اصدمك و الله .. بس بيليف مي , خليك في البنت اللي كنت بتتخيلها فوق احسن و ياريت لو تتأكد إذا كانت ليها ف حمامات البنات ولا لأ .

Tuesday, February 28, 2012

لحظات

فيه لحظات كدة في حياة كل واحد فينا ممكن متكونش ذات اهمية ولا فارقة في حياته بس بيفتكرها .. و انا فيه لحظات مالهاش لازمة بس معلقة في دماغي مبتتطلعش ..

لحظة ما اول مرة أمي عملت فيها ما يسمى بالبيض الاسكتلندي و من ساعتها معملتوش تاني

لحظة ما ركبت التاكسي و اكتشفت اني نسيت محفظتي و خليت السواق يرجع تاني و طلع راجل ناقص و افتكرني بنصب عليه

لحظة ما المدرس طردني برة الفصل في ثانوي و تجرأت و لأول مرة و قلتله إفكس لنفسك الدنيا سقعة و عملي استدعاء ولي امر

لحظة اول مرة اقول الكلمة الاعتراضية للشخص المستفز اللي كل مرة هدوئي و برودي بيمنعوني اقولهاله

لحظة ما زورت إمضة أمي و انا في ابتدائي عشان جبت درجة وحشة في إمتحان العربي و المشكلة ان ضميري نقح عليا و قلتلها و مضتهالي عادي

لحظة تواصل جدتي مع صديقنا الهندي بالإشارة عشان يفهموا بعض .. و الغريب كانوا بيفهموا بعض فعلا

لحظة اول مرة العب كورة و شوطتها ببوز الجزمة و قعدوا يضحكوا عليا كتير

لحظة الخيالات اللي بيتجيلنا انا و أختي لما بيكون البيت فاضي و يلا بينا نعمل حفلة و في الاخر ينتهي بينا الحال اننا ننام بدري

لحظة ما دخلت حمام محطة مصر و الست قالتلي اللي تحت ببلاش و اللي فوق بجنيه .. حتى فك الزنقة بفلوس

لحظات ممكن متكونش تفرق معاك ولا معايا ف شئ بس مدام معلقة معاك تبقى مهمة , عشان كدة حاول تستمتع بكل لحظات حياتك .

Sunday, February 26, 2012

قال اتغير قال

 عايزين تسمعوا جملة في منتهى الابتذال ؟ بس كدة ؟ عنيا   .. "اللي بيحب حد بيتغير عشانه"

ها حسيت بالابتذال ولا لأ ؟ محستش ؟ مفهمتش ؟ طيب يبقى نقطة و من الاول السطر و نبدأ .

احب ابشرك انه لأ مش مقتنعة اللي بيحب حد مش بيتغير عشانه , اللي بيحب حد و عايزه يتغير يبقى مبيحبوش , ايوة مبيحبوش طبعا , يعني انا واحد يحبني و ييجي يقولي انا بحبك بس عايزك تتغيري ف كذا و كذا و كذا .. لا يا راجل ؟ ده كلامك ؟

مدام فكرت تنطس في نظرك و تحب يبقى لازم تعرف ان الحب ده زي اي حاجة في الدنيا .. مفيش حاجة بيرفكت , الكمال لله وحده , و لازم العشر حاجات اللي انت عايزهم في الوشينج ليست بتاعتك اللي فيها صفات الكات وومان ولا صفات الراجل ابو حصان ابيض - اللي معرفش ليه خلوه يركب حصان ابيض لو كان بني او اسود هيبقى احسن كتير – عشان تلاقيها لازم تشطب على حاجة او حاجتين من اللي في الليستة .

هتقولي انتي بتحبطيني ليه .. لأ مش بحبطك انا بقول حقيقة , انت لما تغير حد عشان انت بتحبه ولازم يتغير عشانك يبقى انت كدة محبتش اللي فيه .. المفروض اللي بيحب ده بيحب الوحش و الحلو كله فوول باكدج على بعضها فيها الحلو و الوحش .. لأن انت كمان يعني مش بارم ديله , كل واحد فينا فيه عيوبه او حتى مش عيوب حاجات معينة متعجبش الشخص التاني ..

سألتني اخت فاضلة  إفرضي هو بيعمل حاجات غلط و انا عايزاه يبطلها ... سؤال غريب من شخصية اغرب مش عارفة استحملت اقعد معاها إزاي , المفروض لو هو بيعمل حاجة " في نظرك" غلط او تضايقك المفروض هو اللي يبطلها عشانه هو الاول قبل ما يغيرها او يبطلها عشانك , عشان ممكن ف اي لحظة انتي تموتي فلو انتي مٌتى يبقى يرجع تاني للي كان بيعمله ؟

الخلاصة ان اللي بياكل على ضرسه بينفع نفسه , محدش محتاج واعظ يتغير عشانه و كل واحد هو عارف بيعمل إيه غلط و إيه صح و لو عايز يغيرها هيغيرها مش عشانك و مش عشان ابوه و امه .. عشانه هو

Saturday, February 25, 2012

علينا ؟ ده إحنا اتهرينا


بتبهرني قدرة الناس على التحول و التلون على حسب الموقف اللي هما فيه , خصوصا في العلاقات العاطفية .. ببقى هموت و اضحك و اصقف للتمثيل الباهر  عشان الناس توصل للي هي عايزاه بأي وسيلة ممكنة , يا دين النبي .. هي الناس كدة إزاي ؟

المفروض ان كل واحد ليه شخصية .. الشخصية دي بتتكون على اساس البيئة اللي اتربى فيها و الناس اللي حواليه , كل واحد فينا عنده باسوورد الشخصية بتاعه اللي محدش يعرفه غير اللي زيه بالظبط .

تلاقي البت من دول ارتبطت بواحد متدين .. تاني يوم تروح هوبا لابسة حجاب و عباية و ماسكة قرأن , حلو جميل اللهم قوي إيمانك يا زبيدة .. اول ما يسيبوا بعض فجأة الدنيا تبقى حر .. اصلي مش حساه او المقولة الشهيرة : " ماما قالتلي شكله مكبرك اوي" ... قال يعني البت بتسمع كلام امها اوي .

ولا مثلا واحد يقدم السبت في الكلام و حركات الرخص دي

هو : بتحبي عمرو دياب ؟
هي : طبعا مبسمعش غيره اصلا و انت ؟
هو : انتي بتتكلمي ف إيه .. عمرو ده روحي روحي روحي

 كل واحد فينا بيلبس ماسك لطيف وظريف في الاول لتقليل الاختلافات بيننا و بين بعض عشان نقدر نوصل للي إحنا عايزينه , سواء كان شغل او ارتباط او اي حاجة عايزنها

المشكلة قى ان الماسك ده لامؤاخذة مصري و صنع بلدنا و مبيتكسرش .. بس بيقع , محدش بيقدر يقاوم طبيعته , طرزان انا فاكرة لما جين نضفيته و خليته بني ادم و لبس بدلة و العيشة ارتاحت , مقدرش يتجاهل طبيعته اللي اتعود عليها .. بعد فترة قطع بدلته الجميلة و رجع ينط من شجرة لشجرة باللباس إياه .

إعرف نفسك و حبها زي ما هي .. متتغيرش عشان حد او حاجة , اوصلها بطريقتك بأسلوبك و لو معرفتش توصلها يبقى بناقص يا عم .. فكك من وجع الدماغ و دور على حاجة تانية تقدر تمشي مع الباسورد بتاعك .

Wednesday, February 22, 2012

نقطة دم

ملحوظة : هذا المقال غير متوفر و غير مفهوم لذوي العقول الغير المتفتحة .

الحقيقة إني بقيت بستعجب من اللي بيحصل حواليا في مجتمع انا عايشة فيه .. عايشة مع ناس متناقضة مع بعضها .. بيفكروا بشرع الله و هما بيخالفوه .. بيفكروا في حرية الرأي و هما اصلا ولاد كلب كلهم ف بعض مش بيحترموا اراء الاخرين .

بس انا كبنت في المجتمع ده زهقت و قرفت .. مش عشان انا مش واخدة حريتي , لكن عشان انا موضوعة تحت ميكروسكوب .. بتعمل إيه , راحت فين , ماشية مع مين . في حين ان الولاد محدش بيحطهم تحت ميكروسكوب , عايز ينزل يتفضل عايز يحشش اهو بيجرب عايز يقضيها مع البنات *و نفتح مخنا شوية و نوسع افاقنا في كلمة يقضيها* نضحك و نقول الواد كبر .

في حين ان مجتمعي العزيز , مبيفكرش فيا غير من ناحية نقطة الدم اللي بتنزل مني ليلة فرحي للدلالة على عذريتي ... لو نزلت ابقى انا كدة اهلي عرفوا يربوني لكن لو منزلتش يبقى غالبا هطلق و اهلي هيتبروا مني و يعزلوا و هغير إسمي و ممكن اعمل عملية تغيير جنس بالمرة و يبقى اسمي تامر .

ربنا سبحانه و تعالى لما نزلنا ايات عن الزاني و الزانية .. مقالش اصل الزاني محدش بيعرف هو عمل كدة ولا لأ لكن البنت متعملش كدة عشان غشاء بكارتها ,  عقاب الزاني هو هو عقاب الزانية .. عقابهم او جزائهم و سيئاتهم في الاخرة و في الدنيا برضه هو هو .. البنات مش بتتجلد اكتر من الولاد ... مع ان عقابهم في الدنيا يصعب جدا إثباته ه .

ماشي انا همشيها معاك انها عيلة فايقة و بتفكر , لما يعرفوا ان ابنهم عمل كدة هيهزقوه و عيب و حرام يابني .. لكن هل هو ده رد فعلهم لو بنتهم عملت كدة ؟ هيقولولها عيب و متعمليش كدة تاني عشان حرام ؟ ولا هتتضرب و مش هتنزل من البيت و تتحرم من الدراسة و يلبسوا اسود و شغل نحن لا نزرع الشوك   ده لحد ما يجيلها عدلها اللي برضه عدل مايل هيطلقها لما متنزلش نقطة الدم ... المشكلة ان نقطة الدم بقت مهمة اوي لدرجة ان ممكن ممكن بنات يبقوا عذراوات لكن عملوا كل حاجة في حياتهم و مع اي حد و محدش هيعرف ...

عقلنا في راسنا مش في مؤخراتنا ... العدل لا يتجزأ يا حلوين , زي ما بتعمل معايا عشان لو على كلامك عشان *ربنا* إعمل معاه هو كمان كدة و متخليهوش يتفاخر بإنه ماشي حيحان على نفسه , مثل حقه في زوجة عذراء فأيضا حقي في رجل بتول , مثل جزائي إذا ما فقدت عذريتي قبل الزواج من إهانة و  النظر إلي كمومس فأيضا حقي في تطبيق نفس النظرة و نفس الإهانة عليه ... نقطة الدم دي المفروض تبقى في غشاء فكرنا و ليس في غشاء بكارتنا ..

إلا من تابوا من بعد ذلك و اصلحوا فإن الله غفور رحيم *سورة النور*

حد خالع راسه ؟

ملحوظة : لو كنت من اصحاب العقول المريضة اللي هتفهم كلامي غلط بطريقة او بأخرى , إرحم نفسك و إرحمني و متقراش احسن .. هذا المقال لمن يقدرون نعمة التفكير فقط .

قالك إيه بقى يا سيدي .. واحد بريطاني قابل شيخ فقاله يا شيخ يا شيخ هو انتوا ليه البنات و الستات عندكم بيتحجبوا ؟ راح الشيخ جابله اتنين بونبوني لامؤاخذة .. واحدة متغطية و مقفولة و التانية مش متغطية و عالارض و ماليانة تراب و ملموم عليها الدبان , قاله لما تيجي تاكل هتختار إيه ؟ البريطاني اسم النبي حارسه و صاينه يارب قاله طبعا المتغطية .. قاله إحنا بقى عشان كدة بنحجب بناتنا و ستاتنا راح البريطاني عينيه دمعت و حضن الشيخ و هاتك يا عياط .

اوك حد يجيبلي كيس اسود بسرعة عشان هرجع !! لأ بجد ! يعني إيه انا اتشبه ب " بونبوني" ؟ سلعة !

سيبك برضه انه بيشبهني بسلعة يا سيدي انا راضية , لكن فكرة ان البنت اللي مش مغطية شعرها انها عالارض و منحلة و كله معلم عليها و ملموم عليها الدبان هي فكرة بشعة على فكرة .. و للأسف الفكرة دي في دماغ ناس كتير , و كتير من الولاد لما بييجوا يرتبطوا او يفكروا يتجوزوا مثلا يقولك انا اخد واحدة محجبة عشان عارفة ربنا و محترمة .

هالو!! مش معنى اني بإرادتي مش محجبة و اخترت اني مغطيش شعري اني ابقى منحلة و معرفش ربنا .. بالعكس ! انا ممكن اكون مؤمنة بربنا اكتر من اي واحد بدقن .. ممكن اكون بصلي و حافظة قرأني و ديني اكتر من واحدة محجبة و من البيت للشغل و من الشغل للبيت , للأسف الفكرة السطحية الغبية الحقيقة في الحكم على الناس من مجرد شكلهم هي نظرة بترجعنا لورا مش بتطلعنا قدام .

يعني ايه اللي يضمنلك ان المحجبة دي محترمة ؟ انا مش بهاجم المحجبات اللي على عيني و راسي من فوق لكن بهاجم فكرة الحكم على الاشخاص بالمظاهر .. نفس نظام " هو اه منافق و حرامي و بتاع نسوان لكن الشهادة لله مربي دقنه و بيصلي الجمعة" .. معرفتكش انا كدة

الحجاب في نظري مش بس حجاب الشعر .. لكن حجاب الروح و الفكر و العقل , العفة مش في المظاهر العفة في تصرفات اللي قدامي اللي بجبره على احترامي مش بحجابي او بلبسي لكن بتفكيري و طريقتي .

و ياريت اي شيخ اي ولد اي بنت اي بتنجان شايفة ان البنات اللي مش محجبة هي سلعة مرمية في الشارع على رأي الراجل الفاضل اللي فوق .. يروح اي مصحة نفسية يعالج فيها نفسه من الافكار الغير منطقية و الشاذة و ياريت نبطل نفكر بأعضائنا التناسلية شوية .

Tuesday, February 21, 2012

8 جرائم ترتكب في حق البشرية


1-   البادي كارينا الكم : بجد بيبهرني خصوصا في الصيف تحت البادي النص كم بقى و مع حركة الاذرع فتنبعث رائحة اشبه برائحة القبر .

2-   القمصان المفتوحة حتى السرة : عزيزي , عارفين إنك كبرت و بقيت راجل و طلعلك شعر في صدرك .. ف زيادة الهرمونات الرجولة اللي عندك اللي مخلياك فاتح قميصك لحد الحزام مش هتفيدنا ف شئ ... استر نفسك

3-   كعب عالي في الصباح الباكر : طق طق طق طق .. مبتصدعيش ؟ سيبك مننا يعني , انتي كواحدة ماشية عالصبح و لسة صاحية من النوم بتعملي الصوت ده مبتصدعيش ؟ بس بيعجبني فيكي التوازن بصراحة لدرجة ان الجزمة فلقت من الجنب عشان مش عارفة تمشي .. إشتري نفسك و إلبسي عالأرض الصبح

4-   الكلاسيك شوز اللي ببوز : ممكن اعرف حاجة ؟ انت كدة جامد و ستايل ؟ ممكن اعتبرها جزمة مش كلاسيك شوز .. او الاوقع بُلغة مش جزمة ... احب اصدمك , لأ يا حبيبي مش شيك , مش هقتنع برضه متحاولش

5-   طرحة مشكلني حبك مشكلني : اللي بيعجبني في البنات و الله الكرييشان بجد مش بتريق , خصوصا المحجبات عشان بيواجهوا صعوبات في اللبس المناسب و كدة ... بس حرام يا حبيبتي منك ليها حرام يا ماما , القبة اللي فوق راسك دي لازمتها إيه ؟ 5 طرح فوق بعض ؟ و ياريتك عدلة .

6-   السبيدو AKA سلب : مش معنى اننا رايحين ننزل البحر و لابسين مايوه يبقى تستغل الفرصة و تلبسلي اللامؤاخذة "السلب" .. دود , صدقني إنت فاهم الدنيا غلط .. 

7-   الحواجب التاتو : ليه ؟ ليه ؟ إيه المبرر افهم ؟ خصوصا بقى لو مربعين من قدام و عاملين خط مايل على فوق .. روحي ياما شيليهم الله يرضى عليكي الواحد فيه اللي مكفيه

8-   السوالف : هاها لأ مش سوالف البنات .. سوالفك انت يا حلو ! ياريت كان ينفع ارفق المقال بشوية صور .. الخط الرفيع مش موضة , و الفيس بريسلي ستايل مش موضة و إنك تعمل فيها تلات خطوطو بالموس برضه مش موضة , خليك شاب طبيعي و ارحمنا و إرحم نفسك

ملحوظة صغيرة : زي ما بيكتبوا كدة مقالاتي تعبر عن ارائي ( انا ) بس .. يعني ممكن انت تطلع صح و انا اللي غلط , ف متاخدش الكلام ده على قلبك .

Wednesday, February 15, 2012

الصراع المعتاد ... و المستمر

المكان : كافيه في وسط البلد
الزمان : بليل

العقل : اصطبحنا و اصطبح الملك لله ..

القلب : قول صباح الخير صباح الفل

العقل : مش بقولك اصطبحنا ؟ نعم يا فايق .. اموت و اعرف بتبلبع إيه

القلب : و هو الطبيعي يعني الواحد يبقى مكشر كدة ؟ إيه المشكلة لما ابقى فايق مش احسن من الخلقة اللي الواحد شايفها عالمسا دي

العقل : و ابقى فايق ليه افهم ؟ شايف فيه حاجة عدلة ؟ مش كفاية عمايلك اللي الواحد هيتجن منها ؟ و بعدين ييجي منين الفوقان و انا كل يوم سهران مع الجتة لحد الصبح

القلب : الله ما تسيب الراجل فرحان و مش عايز ينام من فرحته ... ده انت المفروض تفرح معاه و تديله امل بدل الوساوس اللي عمال تجيبهاله دي

العقل : لا تصدق اتأثرت لا يا ولا و الله اتأثرت .. وساوس إيه يا فاشل يا بتاع السنس انت .. يابني انا لولايا كان زمان الواد ساب الكلية من زمان و مسك جيتار و قعد عالقهوة يألف اغاني و ضيع مستقبله لو كان سمع كلامك بس الحمد لله طلع بيفهم

القلب : عارف مشكلتك إيه ؟ إنك معندكش إحساس .. يعني انت شايفه مبسوط بهندسة اللي دخلها ؟ شايفه بيذاكر بشغف ؟

العقل : بيذاكر ب إيه ؟ لا عدها و النبي عشان جديدة على الخلايا عندي

القلب : يادي قلة الذوق ! يا عم استنى اخلص كلامي .. بشغف يعني بحب للحاجة اللي بيذاكرها .

العقل : و هيعمل إيه بالحب يا عم المرهف في الدراسة .. الحب هيأمنله مستقبل ؟ ولا الجيتار اللي كنت عمال تنخور بيه في دماغه كان هيأكله عيش . و النبي بلاش انت بحركاتك اللي بتنقطني .. و بعدين ما تمسك نفسك و تجمد كدة شوية , انت كل حاجة دوم دوم دوم دوم و تسرع دقاتك و تتعب الواد معاك

القلب : دوم دوم دوم دوم دي عشان بحس بالجمال حواليا و بستمتع بكل حاجة مش زيك 1+1=2 .. بلاش تبقى ضربش كدة

العقل : انت عارف مشكلتك إيه ؟ إنك عايش ف عالم المعجزات اللي هو وياك انا بنسى و بتحدى العالم و الناس و

القلب (مقاطعا) : إيه ده الله انا بحب الاغنية دي اوي

العقل : لأ انا كدة هيجيلي جلطة .. يابني ارحمني من سهوكة امك إحنا ف إيه ولا ف إيه . بتخلي الواد شبه الاهبل بيقعد يبرق كدة و الناس تكلمه و هو سرحان شبه المختلين

القلب : انت مش ملاحظ انك اوفر اوي ف ادائك ؟ بقولك إيه بس بقى عشان انا خايف عليه و شكله ابتدى يتشغل باللت و العجن اللي بنقوله

العقل : ما لازم يتشغل هو إحنا مش بنتكلم ف حياته ؟

القلب : طب بس بقى عشان بدأت اعرق .. دوم دوم .. إلحق اهي داخلة الكافيه اهي اسكت خالص بقى عشان انا ميت ف جلدي

العقل : ادي اللي انت فالح فيه المسخرة بس ... انا هتخمد شوية و اسيبكوا تلافلفوا مع بعض حبة .. عداني العيب انا كدة ها

القلب (غير مبالي بكلامه ) : دوم دوم دوم دوم .

Monday, February 13, 2012

انا و هي

ما هذا ؟ .. إنه شجار على ما يبدو , "عادي زي كل مرة"

صوت ارتطام  و صراخها ايقظني من احلامي مع الدمي

سرت على اطراف اناملي حتى الباب .. هل اخرج لأرى ما حدث ؟ هل ابقى و اتجاهل هذا الصراخ ؟ ما هذا ؟ إنه صوت عدة اشخاص تنهرهم هي بشدة .. لن اقبع مكاني سأخرج .

اراها و قد وقفت امام المرأة تتحسس وجهها و هي لا تصدق و الدموع تكاد تكون حمراء .. لا ادري هل هذا بسبب نزيف انفها ام بسبب إحساسها بالقهر , لم تراني بعد .. اشعر و كأنني شبح يتجول في ارجاء بيته القديم .

اسمعه بوضوح في الطابق السفلي يتكلم بحدة , لا ادري ماذا حدث او ما يحدث , اخر ما اذكره هو خروجي من المصعد و دخولي عالمي الصغير .

اراها و قد انهارت و هم حولها فرحين بإنكسارها كما يفرح الذئب بوقوع فريسته و انا وحدي اراها قوية .. بل اقوي من اي وقت مضى .

تحاول ان تجمع شتات افكارها و تقاومهم و لكن لا حيلة لملاك وسط الاعيب الشياطين .

ها قد وقفت و ارى نفسها العزيزة  تمزقت .. لم ادري ما بإستطاعتي فعله الان .

اسرعت إلى عالمي الصغير الوردي و نظرت حولي و اخترت اعز صديق لدي .. ذلك الارنب الوردي الذي كان كان لا يفارق احضاني منذ ان اهدته لي .

هرولت إلى الطابق السفلي انا و ارنبي لأرى ملاكي الحارس ينتظرني .. امسكت بيدها فأعطيتها قليلا من طاقة ارنبي السحرية .

نعم , لقد هربنا من السجن الجميل .. من القصر المقيت , اراها تستمتع بالهواء كالطير الذي ظل اسير صاحبه و إذ بالقفص ينفتح على مصراعيه امامه ... تنظر لي مبتسمة ولا تتكلم , فأنا افهمها بدون كلام .

اراها كما اعتدت رؤيتها دائما .. عزيزة , قوية , ابية .

Friday, February 10, 2012

هذيان منتصف الليل


عارف لما يبقى حد وحشك اوي و لما تتصل بيه تندم إنك اتصلت اصلا ؟

عارف لما تاكل اكلة حلوة جدا تحس بيها انك مش عايز تاكل حاجة تانية بعديها عشان طعمها يفضل ف بقك و بليل بطنك توجعك و متبطلش ترجيع ؟

عارف لما تبقى شايف انك لو حاجة معينة حصلت هتبقى اسعد إنسان في الدنيا و لما تبذل مجهود خارق عشان تعملها و تتحقق تستخسر مجهودك ده عشان محستش انك اسعد إنسان في الدنيا ؟

عارف إحساس لما موبايلك يفصل في نص مكالمة مصيرية و تقعد تدور عالشاحن في البيت متلاقيهوش خالص لحد فين و فين تلاقيه في الفيشة اللي جنبك و انت مش واخد بالك ؟

عارف شعور إنك تبقى قاعد تتفرج على ماتش لفريقك اللي بقاله كتير مكسبش و اخيرا كسبان الفرقة تانية و ييجي فيكو جون ف اخر دقيقة في الوقت الضايع ؟

عارف لما تبقى قاعد بتمثل على شخص معين و تبررله انك مردتش ليه عالتليفون و بعدين تسرح فجأة و تقول لنفسك ليه مقولوش مش طايق أمك إيه المشكلة لما ماردش عليك يعني ؟

عارف لما تبقى حاسس إن الدنيا كلها جاية عليك و ان الناس كلها ضاغطينك و بعدين في لحظة معينة تكتشف إنك بتحور على نفسك عشان تعيش دور الحزين و مفيش مشاكل عويصة فعلا ؟

عارف لما تبقى مدفي تحت البطانية و بعدين تحس انك عايز تعمل بيبي و تضطر تقوم من السرير و كمان متلاقيش شبشب ف تمشي عالبلاط لحد الحمام ؟

عارف لما تعيش دور البطل الجامد اللي عمل حاجة خطيرة جدا و انت شايف بينك و بين نفسك إنك معملتش حاجة بس عشان ترضي ضميرك و غرورك و خلاص ؟

عارف لما تروح حتة هادية و قدامك بحر و الجو صافي و برضه متحسش بالصفاء النفسي اللي قالولك عليه ؟

عارف لما تبقى جعان و تقوم تسخن و تتكلم في التليفون عشان تضيع وقت لحد ما يسخن و بعديها بربع ساعة تدخل المطبخ تلاقي انك مولعتش البوتاجاز اصلا ؟


عارف لما تبقى متأخر عن ميعادك في البيت و محدش كلمك يزعق و يقولك تعالى فتقلق اكتر من هدوء ما قبل العاصفة ده  و تروح تلاقيهم سهرانين برة و يقولولك متستنناش كل انت و نام ؟

عارف لما تدخل تستحمى و المية السخنة متقطعش عليك ولا حاجة بس تبقى مقلق طول الوقت و انت تحت الدش إنها تقطع ؟

عارف لما تبقى فاضي و هتموت و تنزل و متلاقيش حد تنزل معاه ؟

عارف لما تبقى حاسس إن ربنا بيحبك اوي و انه سامعك اكتر  من سمعه لأولياء الله الصالحين رغم إنك مبتعملوش حاجات كتير من اللي طالبها منك ؟

عارف لما تبقى هتموت و تكتب و مش لاقي حاجة تكتبها فتكتب اي كلام يمكن تطلع بحاجة حلوة ؟ اهو ده بقى اللي انا عارفاه دلوقتي .

Tuesday, February 7, 2012

المحرمات الخمسة


  عشان عيب – عشان انتي بنت .. طبعا فاكرني اتجنيت لأ متجنتش بس دي هي "الكونفرسيشن" بتاعت كل مرة بحاول اعمل حاجة من المحرمات ... اه محرمات و النيعمة , خد عندك عد ورايا يا سيدي :  

1-    الدخان : عمركم شفتوا بنت بتشرب سجاير ف نص الكلية بتاعتها ؟ لأ ! ليه ؟ مش عشان السجاير ممنوع في الكلية ما الحلاليف بيشربوا سجاير عادي في نص المخروبة .. بس مينفعش عشان هي " بنت " .. بلاش الكلية مكان العلم ليه احترامه برضه .. طب شفتوا بنت واقفة في الشارع مع اصحابها بتشرب سجاير ؟ لأ برضه .. و الله البنات المدخنين بيصعبوا عليا عشان صعوبة شربهم للسجاير ف اي مكان .. كفاية بصة عبده المشتاق للبنت اللي بتسجر يا يبصلها يقولها استغفر الله كأنه رجس من عمل الشيطان .. يا يغمزلها غمزة "ما تيجي نيجي" .

2-    البيات برة : البنت مينفعش تبات برة بيتها .. اموت و اعرف ليه , يا ستي هبات عند صاحبتي انا مش هبات في الشارع .. لأ .. طب ليه عشان مفيش بنت بتبات برة بيتها , معرفش إيه السبب و الله لحد دلوقتي بحاول الاقي لسؤالي إجابة .. السرير بيسأل عليا مثلا و يقول هي راحت فين ولا المخدة بتزعل و تسيب البيت ؟ و يا سلام لو قلت هبات ف اعتصام ولا حاجة .. بحب ف أمي حلولها السهلة يعني " سيبيهم عالنوم " و ف نفس ذات الوقت مينفعش اتأخر ف كدة كدة بتحور عليا .

3-    التأخير : بتقعد كل شوية تبص في الساعة لأحسن تكون اتأخرت و تقعد تحسب مسافة السكة قد إيه عشان تعرف هتوصل بالظبط البيت الساعة كام ؟ لأ طبعا عشان انت مش بنت .. هو ليه إحنا كبنات مش بنتأخر ؟ هما مش اهالينا ربونا برضه احسن تربية ؟ يعني الحاجة الأوف العيب الشيطان هيوسوسلي اعملها بليل و الصبح او بليل مش متأخر لأ ؟ طب اعمل إيه لو حسيت إني مضايقة و مخنوقة بليل من بعد منتصف الليل كدة و عايزة انزل اتمشى شوية ؟ لأ اخبط دماغي في الحيط احسن نزول بليل متأخر إيه و كلام فارغ إيه ؟ البنات " المحترمة " مبتتأخرش .. حاضر

4-    الشتايم : سوربرااااااااااااااايز ... ايوة البنات بتشتم و لسانها فالت كمان اكتر من الولاد .. بس عشان هي طبعا " بنت " لازم تبقى رقيقة و وشها يحمر لما تسمع شتيمة اللي المضروب بيشتمها عادي و تبصله ببراءة و تقوله " يعني إيه الكلمة دي " ... تقولش الشتيمة اللي بتطلع من بقه بتبقى بريحة المسك و هي لما بتطلع من بقها بتبقى بريحة الكاكا

5-    لعب الكورة : ده يمكن مش لمعظم البنات اوي .. بس انتي ممكن تلعبي اي حاجة مع اصحابك إلا الكورة ... كونكان , بصرة , الشايب .. كله إلا الكورة .. انا فاكرة كويس اصحابي الولاد الرزلين لما كنت بقولهم عايزة العب كورة معاكم .. يقولولي " مبنلعبش مع بنات " .. و هو اصلا يكون عنده فلات فووت و مالوش فيها بس برضه ميلعبش كورة مع بنات عشان مينفعش بنت تلعب كورة في الشارع .. بس ده ميمنعش ان المرة الوحيدة اللي لعبت كورة معاهم من ساعتها و هما مش بيفتكروا الواد ميدو غير بالكوبري اللي اخده منى .. اه و النعمة حصل

 البنات مينفعش تدخن , مينفعش تتأخر , مينفعش تقف في الشارع لوحدها , مينفعش تبات برة لوحدها , مينفعش تسافر لوحدها ...

أمي العزيزة :  ينفع انتحر لوحدي ولا مينفعش ؟