هذيان منتصف الليل

عارف لما يبقى حد وحشك اوي و لما تتصل بيه تندم إنك اتصلت اصلا ؟

عارف لما تاكل اكلة حلوة جدا تحس بيها انك مش عايز تاكل حاجة تانية بعديها عشان طعمها يفضل ف بقك و بليل بطنك توجعك و متبطلش ترجيع ؟

عارف لما تبقى شايف انك لو حاجة معينة حصلت هتبقى اسعد إنسان في الدنيا و لما تبذل مجهود خارق عشان تعملها و تتحقق تستخسر مجهودك ده عشان محستش انك اسعد إنسان في الدنيا ؟

عارف إحساس لما موبايلك يفصل في نص مكالمة مصيرية و تقعد تدور عالشاحن في البيت متلاقيهوش خالص لحد فين و فين تلاقيه في الفيشة اللي جنبك و انت مش واخد بالك ؟

عارف شعور إنك تبقى قاعد تتفرج على ماتش لفريقك اللي بقاله كتير مكسبش و اخيرا كسبان الفرقة تانية و ييجي فيكو جون ف اخر دقيقة في الوقت الضايع ؟

عارف لما تبقى قاعد بتمثل على شخص معين و تبررله انك مردتش ليه عالتليفون و بعدين تسرح فجأة و تقول لنفسك ليه مقولوش مش طايق أمك إيه المشكلة لما ماردش عليك يعني ؟

عارف لما تبقى حاسس إن الدنيا كلها جاية عليك و ان الناس كلها ضاغطينك و بعدين في لحظة معينة تكتشف إنك بتحور على نفسك عشان تعيش دور الحزين و مفيش مشاكل عويصة فعلا ؟

عارف لما تبقى مدفي تحت البطانية و بعدين تحس انك عايز تعمل بيبي و تضطر تقوم من السرير و كمان متلاقيش شبشب ف تمشي عالبلاط لحد الحمام ؟

عارف لما تعيش دور البطل الجامد اللي عمل حاجة خطيرة جدا و انت شايف بينك و بين نفسك إنك معملتش حاجة بس عشان ترضي ضميرك و غرورك و خلاص ؟

عارف لما تروح حتة هادية و قدامك بحر و الجو صافي و برضه متحسش بالصفاء النفسي اللي قالولك عليه ؟

عارف لما تبقى جعان و تقوم تسخن و تتكلم في التليفون عشان تضيع وقت لحد ما يسخن و بعديها بربع ساعة تدخل المطبخ تلاقي انك مولعتش البوتاجاز اصلا ؟

عارف لما تبقى متأخر عن ميعادك في البيت و محدش كلمك يزعق و يقولك تعالى فتقلق اكتر من هدوء ما قبل العاصفة ده  و تروح تلاقيهم سهرانين برة و يقولولك متستنناش كل انت و نام ؟

عارف لما تدخل تستحمى و المية السخنة متقطعش عليك ولا حاجة بس تبقى مقلق طول الوقت و انت تحت الدش إنها تقطع ؟

عارف لما تبقى فاضي و هتموت و تنزل و متلاقيش حد تنزل معاه ؟

عارف لما تبقى حاسس إن ربنا بيحبك اوي و انه سامعك اكتر  من سمعه لأولياء الله الصالحين رغم إنك مبتعملوش حاجات كتير من اللي طالبها منك ؟

عارف لما تبقى هتموت و تكتب و مش لاقي حاجة تكتبها فتكتب اي كلام يمكن تطلع بحاجة حلوة ؟ اهو ده بقى اللي انا عارفاه دلوقتي .

المحرمات الخمسة

  عشان عيب – عشان انتي بنت .. طبعا فاكرني اتجنيت لأ متجنتش بس دي هي "الكونفرسيشن" بتاعت كل مرة بحاول اعمل حاجة من المحرمات ... اه محرمات و النيعمة , خد عندك عد ورايا يا سيدي :  

1-    الدخان : عمركم شفتوا بنت بتشرب سجاير ف نص الكلية بتاعتها ؟ لأ ! ليه ؟ مش عشان السجاير ممنوع في الكلية ما الحلاليف بيشربوا سجاير عادي في نص المخروبة .. بس مينفعش عشان هي " بنت " .. بلاش الكلية مكان العلم ليه احترامه برضه .. طب شفتوا بنت واقفة في الشارع مع اصحابها بتشرب سجاير ؟ لأ برضه .. و الله البنات المدخنين بيصعبوا عليا عشان صعوبة شربهم للسجاير ف اي مكان .. كفاية بصة عبده المشتاق للبنت اللي بتسجر يا يبصلها يقولها استغفر الله كأنه رجس من عمل الشيطان .. يا يغمزلها غمزة "ما تيجي نيجي" .

2-    البيات برة : البنت مينفعش تبات برة بيتها .. اموت و اعرف ليه , يا ستي هبات عند صاحبتي انا مش هبات في الشارع .. لأ .. طب ليه عشان مفيش بنت بتبات برة بيتها , معرفش إيه السبب و الله لحد دلوقتي بحاول الاقي لسؤالي إجابة .. السرير بيسأل عليا مثلا و يقول هي راحت فين ولا المخدة بتزعل و تسيب البيت ؟ و يا سلام لو قلت هبات ف اعتصام ولا حاجة .. بحب ف أمي حلولها السهلة يعني " سيبيهم عالنوم " و ف نفس ذات الوقت مينفعش اتأخر ف كدة كدة بتحور عليا .

3-    التأخير : بتقعد كل شوية تبص في الساعة لأحسن تكون اتأخرت و تقعد تحسب مسافة السكة قد إيه عشان تعرف هتوصل بالظبط البيت الساعة كام ؟ لأ طبعا عشان انت مش بنت .. هو ليه إحنا كبنات مش بنتأخر ؟ هما مش اهالينا ربونا برضه احسن تربية ؟ يعني الحاجة الأوف العيب الشيطان هيوسوسلي اعملها بليل و الصبح او بليل مش متأخر لأ ؟ طب اعمل إيه لو حسيت إني مضايقة و مخنوقة بليل من بعد منتصف الليل كدة و عايزة انزل اتمشى شوية ؟ لأ اخبط دماغي في الحيط احسن نزول بليل متأخر إيه و كلام فارغ إيه ؟ البنات " المحترمة " مبتتأخرش .. حاضر

4-    الشتايم : سوربرااااااااااااااايز ... ايوة البنات بتشتم و لسانها فالت كمان اكتر من الولاد .. بس عشان هي طبعا " بنت " لازم تبقى رقيقة و وشها يحمر لما تسمع شتيمة اللي المضروب بيشتمها عادي و تبصله ببراءة و تقوله " يعني إيه الكلمة دي " ... تقولش الشتيمة اللي بتطلع من بقه بتبقى بريحة المسك و هي لما بتطلع من بقها بتبقى بريحة الكاكا

5-    لعب الكورة : ده يمكن مش لمعظم البنات اوي .. بس انتي ممكن تلعبي اي حاجة مع اصحابك إلا الكورة ... كونكان , بصرة , الشايب .. كله إلا الكورة .. انا فاكرة كويس اصحابي الولاد الرزلين لما كنت بقولهم عايزة العب كورة معاكم .. يقولولي " مبنلعبش مع بنات " .. و هو اصلا يكون عنده فلات فووت و مالوش فيها بس برضه ميلعبش كورة مع بنات عشان مينفعش بنت تلعب كورة في الشارع .. بس ده ميمنعش ان المرة الوحيدة اللي لعبت كورة معاهم من ساعتها و هما مش بيفتكروا الواد ميدو غير بالكوبري اللي اخده منى .. اه و النعمة حصل

 البنات مينفعش تدخن , مينفعش تتأخر , مينفعش تقف في الشارع لوحدها , مينفعش تبات برة لوحدها , مينفعش تسافر لوحدها ...

أمي العزيزة :  ينفع انتحر لوحدي ولا مينفعش ؟

ثقافة الساندوتش

تبيع ؟ ابيع يا باشا ...دايما أمي لما كنت بسألها عن رأيها في شخص معين ساعات كانت بترد رد لطيف اوي بيلم الليلة كلها , بتقولي " ده راجل ساندوتش" ف انا مكنتش فاهمة ساعتها يعني إيه بس فهمت و انا هقولكم دلوقتي و هتفهموا...

انا مش فاهمة ناس كتيرة مصدومة من موقف البابا شنودة ليه ؟ إحنا لو بصينا على مواقف رجال الدين هنلاقيها كلها مخزية و ده الطبيعي لأنهم بيمثلوا ثقافة ماشي بيها جزء كبير اوي من الشعب  " قلت جزء اهو بدل معظم عشان محدش يزعل يا ولاد " .. الا و هي ثقافة السندوتش

ثقافة السندوتش بتتلخص في مين اللي هيقدر يأكلني و يحافظ عليا و على مصالحي .. ماليش دعوة بمبادئ ولا اي عك من الحاجات دي .. مبادئ إيه و انا فاضيلكو انتو يا بتوع المبادئ .. دايما بتلاقيها و الله في الافلام يعرضوا على البت المزة انها تبقى رقاصة في الكباريه " هشتغل فتاحة يا بابا " و هي تقولهم رقاصة اه لكن اكتر من كدة لأ شرفي لأ يروح الراجل المقرص " اه قاصدة اكتبها بالقاف عشان عيب
" يقولها خلي الشرف و المبادئ ينفعوكي ..

و ثقافة السندوتش دي في كل المجالات .. إديني ساندوتش و انا اعملك اللي انت عايزه .. يعني يجيبوا صحفي مثلا يدوله ساندوتش فراخ بانية من الغالي اللي بيحطوا عليه مايونيز و يقولوله الكلمتين اللي هيكتبهم و شكرا ..

يجيبوا البابا و يهمزوه بالساندوتش إياه و اشكر يا بابا الرئيس الجليل حسني مبارك .. حاضر هشكره .. إنسى يا بابا دم الشهداء .. حاضر اهم كدة كدة في الجنة برضه .. يا واد يا مؤمن ! إيه ده لأ دي مكانها غلط .. قصدي شاطر يا بابا انت كدة في الامان .

زي ما هتلاقي برضه اي حد كل اللي همه هأكل عيالي إزاي و هو عنده حق .. هيفكر فيمبادئ إيه و هو محتاج الساندوتش اللي يسند طوله طول اليوم ؟

إنه الساندوتش ذو المفعول السحري يا سادة .. و هيفضل الساندوتش مسيطر لحد ما الثورة ربنا ينتعها بالسلامة و تقوم و تشد حيلها و حتى ذلك الحين دعونا من الولولة... سيبك انت بقى من كل ده

تاخد قطمة ؟

شرم

حياتك ملكك انت .. دخلة قافشة مش كدة ؟ إعترف إنك إتأثرت .. المهم , حياتك اه ملكك انت لوحدك و انت اللي المفروض تقرر تعمل إيه و متعملش إيه .. يعني تقرر  إمتى تبقى عايز ترد عالتليفون إمتى متردش .. إمتى تنزل تشوف اصحابك و إمتى متنزلش اصلا ... إمتى تتفرج على فيلم و إمتى تقفل التليفزيون و تنام .. اللي فكرني بالموضوع ده ان كان فيه شخص فعلا انا بعزه قعد يتصل بيا يومين ورا بعض و انا مش برد .. هتقولي ليه , اكيد زعلك في حاجة .. لا خالص بس فعلا ساعات بتحس إنك عايز تبقى مع نفسك او مش عايز تتكلم في التليفون او ممكن تتكلم و مترغيش و انت عارف انك لو رديت الشخص ده هيرغي .. كون انك متردش دي حرية شخصية و متزعلش حد المفروض .. المهم ان الشخص ده زعل مني اني مردتش ف انا بعديها بكام يوم كلمته و قلتله الصراحة اني مكنتش فايقة خالص اني اتكلم و ارغي و كدة ... المصيبة انه زعل ! إزاي مترديش و متبقيش عايزة تتكلمي يعني !

و ده اللي استغربتله .. هي حياتي دي ملكي ولا ملك الناس اللي حواليا .. هل ده واجب على أمي فعلا اني كل ما اشوف اسمه ارد مهما كنت مضايقة او مش طايقة اتكلم مع حد ؟ و على اساس ايه اصلا يبقى واجب عليا اني اعمل كدة ؟

زي مثلا ما حد من اصحابك يكلمك يلا بينا ننزل تقوله ماليش مزاج ... يزعل , طب بتزعل ليه ؟ غلطان اني قلت الحقيقة يعني ؟ لازم اقول أمي قافشة عليا مش رادية تنزلني عشان يبقى عذر اني منزلش ؟ ليه السبب لازم يبقى قهري ؟ ليه ميكونش انا مزاجي مش لطيف ف مش عايز انزل ؟

 عايز خلاصة الكلام " غير طبعا الحاجة اللي متفقين عليها انهم رزلين و كلاب و مبيقدروش " ؟  إعمل لنفسك مكان خيالي كدة نفسك تستجم فيه ... سيوا , شرم , الغردقة , ابو حمص اي حاجة مش فارقة .. خلي ده مكان عقلك الاستجمامي .. عايز متردش على تليفونك و يبقى ليك عذرك انك متردش و عايز متنزلش من غير ما حد يزن عليك او يجيلك البيت ينزلك قولهم انا في غردقة او في شرم و كنت سايب التليفون في السيفون... و خلي المكان ده سيم ما بينك و بين اي حد انت بتعزه و من الاشخاص القليلة اللي بتقدر إزاي اي حد يبقى محتاج يفضي دماغه و يقعد مع نفسه شوية .. قول ورايا بصوت عالي

انا في شرم يا جدعان

ملحوظة : متنساش تقول ان الكاميرا اتكسرت منك في الشنطة و نسيت شاحن الموبايل في البيت عشان كنت مستعجل مستعجل

أنت روش موتس بجد

ايوة ايوة انا خلاص عرفت انا هتكلم و اكتب ف إيه .. إزاي الموضوع ده فايتني و انا بقابله تقريبا كل يوم في حياتي ! تقولولي إيه هو اقولك الافورة .. تقوللي لأ برضه مفهمتش يعني إيه ... اقولك يعني إنك تبقى DRAMA QUEEN !  ... تتنرفز بأفورة و تضحك بأفورة و تعيط بأفورة و تحب بأفورة !

المشكلة ان الناس دي بتفتكر انهم كوول بقى و هما كدة لما اعصابهم بتنهار لما بيسمعوا عمر خيرت و يدمعوا و لما تكتب am in a bad mood  عالفيسبوك و بجد هموت نفسي خلاص كلكم خونة و تقعد تسمعلك في اغاني مصطفى كامل بقى يعني هما كدة الناس هتهتم باللي هما بيعملوه ..

ولا مثلا لما حد من الناس الاوفر دي يبقى بيحب واحدة بقى ... تقولش خلاص الواد لقى فتاة احلامه و ينزل بالأغاني الشاعرية و بحبك اوي يا )N)  .. بدور عليكي من زمان و الحمد لله لقيتك و سبحان الله بعديها بأسبوع يكتب ياريتني ما عرفتك ولا اتجرحت منك " ركزوا في اللي جاية دي و النبي" يا اجمل كدابة ... عندك تعليق ؟ انا عندي بس عيب اكتبه

ولا افورة الثورة ... انا اخدت طلقة في خدي اليمين طلعت من ودني الشمال و شميت قنبلة غاز لوحدي و التانية لعبت بيها كورة و كل ده و انا واقف بضرب طوب و بكتب تويتس على تويتر ... يااااه يابن الجامدة تصدق قشعرت !!

او الافورة في الإكتئاب .. انا حاسة حياتي ضالمة و مفيش بصيص امل و هو اصلا ميعرفش يعني إيه بصيص تلاقيه قراها في عبير و زهور و هو صغير و لزقت في مخه من ساعتها

و احلى حاجة افورة البنت انها تبقى كيوت و هي مع صاحبها .. اللي هو تلاقي طفل صغير تروح ضاحكة الضحكة البلهاء بتاعتها و تقعد تقولك يا توتو و بوتو و نونو و كميل اوي .... خدت بالك من كميل مش جميل ها و تتصور معاه بالمرة

و افورة الولاد كمان فعلا بيبهروني .. انا فاكرة كويس واحد يا عيني كان بيحكيلنا انه كان راجع بليل البيت و فجأة هجموا عليه هو بس " واخد بالك ياللي بتقرا " هو لوحده 15 بلطجي و دمرهم تدميرا سريعا .. كان نفسي يبقى معايا مسدس ساعتها مكنتش لا هقتله ولا هقتل نفسي كنت ههوشه يمكن يلم لسانه شوية

على فكرة انا اللي خلاني اكتب في الموضوع ده شخص اوفر موتس نفسي اعرف مستحمل نفسه ازاي و الله و بعدين ياعيني بيأفور اي دور بيحاول يعيشه .. يعني يبقى بيتكلم سياسة يبقى اوفر سياسة .. يحاول يبقى رجل دين يحط كل اعوذ برب الناس بروفايل بيكتشر .. يحاول يبقى هلس ف يتصور و قميصه مفتوح و مصدرلنا الشعرتين اللي في صدره .. عايزة اقوله الحياة مش كدة و الله الحياة بسيطة جدا على اللي انت بتعمله ده و حاسة ان الافورة دي بتاخد منك مجهود كبير اوي ... في النهاية هما كلمتين ...

بواسيرك يا سيد

سنة جديدة و ناس " بطيئة "

سنة جديدة و بداية جديدة بس الناس متغيرتش .. و مش هيتغيروا عشان السخيف بيفضل سخيف لأخر يوم في عمره , 2011 كانت سنة حلوة بالنسبالي عشان حاجات كتير , انا مش بؤمن بسنة الحظ و كلام مدينة البط ده .. بس بؤمن بالاحداث اللي ممكن تأثر في بني ادم في سنة معينة عشان كدة انا هقول شكرا دلوقتي كتير و هتأسف برضه كتير و اللي هيقولي بتقلدي اعلان فودافون بقى و الجو الرخيص ده يبقى قفلتني منك و ياريت متكملش قراية احسن .

شكرا لأمي اللي نزلتني ايام الثورة و خلتني اشوف بعيني اللي عمر ما إعلام او اشخاص هيعرف يمحيه

اسفة لأمي برضه عشان السنة دي فعلا كل شوية اخد منها الفلوس الفكة اللي معاها

شكرا لمحمود الليثي عشان بحب اغنية سوق البنات بتاعته.. اه بحبها في مانع ؟

اسفة لأصحابي اللي قصرت معاهم بقالي فترة بس عابوكو يعني إيه المشكلة لما اتشغل شوية ؟

شكرا لبولا سالم عشان لولاه مكنش زماني بكتب اي حاجة اصلا

اسفة لعمرو دياب عشان مسمعتش الالبوم بتاعه كتير من ساعة ما نزل

شكرا للظروف اللي عرفتني على ناس زي الفل والله و مش هقول اسماء مش عشان انا عندي دم و خايفة على شعور حد بس هما كتير ف لو فيه فضول ابقى اسأل لو انت منهم

اسفة للمواقف برضه اللي صغرت ناس كتير اوي في عينيا .. برضه لو عندك فضول اسألني و انا هقولك انت منهم ولا لأ

شكرا لشخصية عزيزة عليا جدا عشان مطلعة عينها معايا  .. ولا إيه يا يمنى شعبان ابراهيم معتوق  ها :D

اسفة لكل شخص قريب مني فقد حد عزيز عليه

شكرا احمد حرارة عشان خلتني اعرف ان فعلا فيه سوبر هيروز J شخص فقد كل ما لديه و مازال يتحلى بالإبتسامة

اسفة لكل شخص بقى شايفني واحدة سخيفة و مبقتش زي الاول ... بس و الله انت اللي معندكش دم مش اكتر

شكرا للمواقف اللي علمتني ان شتايم زي اهبل و عبيط و حقير و مجنون مش بتعبر فعلا عن المعنى اللي اقصده و بدلتها بحاجات اوقع بكتير ( ايوة بقى لساني فالت مني )

 انا طبعا حاجات كتير تانية كان لازم تتكتب بس كفاية عليكو كدة شوية شوية و هتيجوا تقعدوا معايا في living بقى ده اللي ناقص .. و عشان يبقى ختم كلامي مسك ف انا لازم اأكد على حاجة مهمة اوي

 يسقط يسقط حكم العسكر

الموت

إيه اتخضيت من العنوان ؟ انا كمان بتخض من الكلمة ساعات , لأنها مقترنة بموت صديقي الله يرحمه و يغفرله و اللي انا لسة مقتنعة انه مسافر و جاي  يا إما انا هروحله .. و موت محسن الكلب بتاعي اللي ملحقتش اتهنى بيه ...

انا فاكرة في الموقفين دول انا عيطت قد ايه .. عيطت عشان مش مقتنعة إزاي حاجة تموت و مش هشوفها تاني , بسمع ان ناس كتير بتموت بس لما حد قريب منك يموت بيبقى الموضوع مختلف و بعدين وانا صغيرة كان عندي اقتناع ان العواجيز بس اللي بيموتوا …

بس بقعد افكر كدة ساعات ان الموت ده نعمة من نعم ربنا بجد , يعني انت دلوقتي عايش حياة مؤقتة و ماشي مقلق , هموت و انا نايم ولا اول ما اصحى .. هموت غرقان ولا حران ولا هموت من الهم ولا عربية هتشلني .. الفكرة مش هتموت ازاي , الفكرة انك هتموت و دي حاجة حلوة ! هتروح لحياة ابدية مش هتموت فيها تاني , و انت already عارف ان فيه 2 options  يا جنة يا نار و ده بإختيارك انت و رحمة ربنا برضه بتعمل شغل ..

هتبقى مع ناس نضيفة و مفيش رغايين ولا فاسدين ولا نصابين .. كل حاجة هتبقى مثالية ده طبعا لو رحت الجنة و لو برضه النار ما انت هتقعد مع الناس اللي شبهك اللي عملت نفس الحاجات اللي انت عملتها غلط في حياتك و ده شئ كويس لأننا دايما بنعاني في الدنيا اننا مش لاقيين حد يفهمنا ...

الخوف من الموت هو عباطة يعني .. خايف تموت ليه ؟ خايف متشفش اصحابك و اهلك تاني ؟ هتشوف ناس احسن و ممكن اهلك يبقوا معاك .. هو انا فعلا بفكر في حاجات غريبة , يعني انا هلاقيهم ازاي ؟ الدنيا هتبقى زحمة ده اولا .. ثانيا افرض تهنا من بعض حلني بقى لو لقينا بعض .. ثالثا هيشفوني كدة سلط ملط ! اكيد ليها حل يعني و بعدين محدش هيبقى فاضي يبص عالتاني .. رابعا الدنيا هتبقى حر يوميها و انا بفرهد بسرعة من الحر و مبستحملش انا كتير خامسا و ده مهم : هو فوق هيبقى فيه نت و كدة مش للتواصل مع الاحياء يعني لأ مع اللي ماتوا برضه و انت فين و في جنة كام و اجيلك ازاي و كدة .. سادسا : هستنى كتير اوي عشان اتحاسب .. عقبال ما كل واحد في الدنيا دي ربنا سبحانه و تعالى يحاسبه و متعرفش بقى كل واحد هيبقى معاه رقم ولا بحروف الابجدية ولا ايه ... ممكن ناس كتير تكون فاكراني بستهزأ و بتريق و تقولولي حرام و كدة لكن و الله انا بتكلم بجد كل دي حاجات بتيجي في دماغي لما بفكر في الحياة بعد كدة و يوم القيامة تحديدا .. طب هل هتبقى هي هي نفس الحاجات اللي هنا هي هي اللي فوق ولا ايه بالظبط .. عموما يارب يجعل يومي قبل يوم اي حد بحبه مش عشان حاجة بس عشان مش عايزة اعيط ولا حد يوحشني انا اروح و انتو تحصلوني و لو عرفت اقلكم ايه اللي فوق او تحت هقولكم مش هبخل على حد .. نحن السابقون و انتم اللاحقون !