فقط كرة القدم وأنيتا هنريك جوتنبرج!

هل تتذكر ذلك المشهد الشهير من فيلم التجربة الدنماركية عندما وصلت نيكول سابا إلى مطار القاهرة وهى بقى الست "البلونداية" ولابسة مش لابسة.. ذلك المشهد عندما ترك الجميع بما فيهم عمال المطار وضباط الشرطة والعريس وقت زفافه والكل تقريبا تركوا كل ما كانوا يفعلوه وساروا ورائها حتى غرفة نومها دون كلل او ملل..

هذا المشهد تحديدا قفز إلى مخيلتى عندما عرفت من بعض الاصدقاء ما حدث من اسبوع بالضبط، ليلة مباراة مصر وغانا.. مباراة العودة التى كنا نأمل بها الوصول للمونديال، ولكن طبعا طبعا لم نكن نستطع تسجيل خمسة اهداف.. فأفضل المتفائلين لم يكن يضع هذا الإحتمال فى الحُسبان. المهم، ان ذلك اليوم ايضا كان الذكرى الثانية لأحداث محمد محمود والتى راح ضحيتها الكثير من شهداء.

وكالعادة سادت حالة من ادرينالين الثورة وقامت عدة اشتباكات بين المتظاهرين الذين نزلوا لإحياء الذكرى ومؤيدى السيسى الذين كانوا رافضين لأى معاداة للجيش فى تلك الفترة من قبل الثوار. المهم برضه ان مش دى المشكلة. بدأت الإشتباكات والمناوشات بين الطرفين حتى الساعة السادسة إلا دقيقة تقريبا، قرر الجميع وقف الإشتباك واتجهوا معًا مؤيدين ومعارضين لشاشة العرض الكبيرة فى ميدان التحرير وجلسوا على الارض سويا لمشاهدة المباراة..

تشيزى صح؟ يعنى مشهد كلاسيكى رومانسى ماشتفهوش غير فى السينما ولولا تم توثيق ذلك الحدث بالصور وبحكايات اصدقائى اللى كانوا هناك انا شخصيا مكنتش هاصدّق.

لكنها كرة القدم عزيزى القارئ، ساحرة مستديرة على حق يعنى! فقط كرة القدم استطاعت ان توقف إشتباكات ضارية وتجبر الطرفين انهم يقعدوا جنب بعض.. طبعا مش هنتكلم انهم بعد الماتش قاموا يضربوا فى بعض تانى.. لكن الأهم ان "ماتش كورة" خلاهم يتغاضوا عن اى اختلافات ما بينهم.

وهو ما لا يفهمه البعض من المتحذلقين اصحاب "ماتلغوا الكورة" او نأجلها شوية.. او اللى بيشوفوا الشعب اللى مهتم بماتش ده ناس تافهة لا ترقى لمستوى تفكيره العميق! الأخ او الأخت العميقة اللى شايفين ان كرة القدم شئ تافه كان ممكن ينزلوا الإسبوع اللى فات وقت ماتش مصر وغانا.. على الرغم من إننا كلنا كنا عارفين ان مستحيل نكسب ومستحيل نتأهل إلا ان الكافيهات والقهاوى على آخرها والناس متحمسة ومتوترة.. هيّصوا بعد جون عمرو زكى وفضلوا متنشنين مع كل هجمة فقط على أمل 1%..

كان فيه صورة لفتاة برازيلية ماسكة يافطة مكتوب عليها "لا نحتاج لكأس العالم.. نحتاج تعليم وصحة والأهم الإحترام"، ناس كتير لقيتها عاملينلها شير على فيسبوك، أنا افتكرتها مصرية فى الاول. الفكرة فى اللى نشروا الصورة عندهم كانوا بيعبّروا عن رأيهم عن ان احنا مش مهم نروح كأس عالم ولا ده من اولوياتنا، الفكرة مش فى مهم ولا مش مهم نروح كأس العالم، الفكرة اننا "محتاجين" نروح كأس العالم.. إنت عندك المواطن التعبان والجعان والزهقان والقرفان من البلد واللى فيها مفيش حاجة بتصبره وتقريبا مفيش اى حاجة بتقوّى كل شوية إنتمائه بمصر غير فرحة فوز المنتخب ونرفزته على اللعيبة عشان يعملوا هجمة صح يجيبوا بيها جون ويفكرّوه باللى باقى من حبه للبلد اللى عايش فيها بلا هوية.

رغم كل مرة على مدى السنوات اللى فاتت يكون منتخبنا عند سوء ظننا ويقعدوا يعشمونا وبرضه ما نتأهلش لكأس العالم إلا إننا برضه بنشجعه.. ما باليد حيلة، يعنى تبقى قاعد ومتكدّر وتشتم فى اللعيبة واحد واحد عشان يلعبوا كويس ويكون اداءهم زى الزفت لكن برضه حرقة الدم فى تلك الحالة ممتعة فى حد ذاتها. وعلى الرغم من فقر معظم الشعب المصرى إلا ان لو اتفتح باب تبرعات لمساندة المنتخب لأى سبب من الأسباب هتلاقى الناس بتتتبرع من فلوسها القليلة عادى جدًا.. مايجيش بقى حد مابيحبش كرة القدم يقوم قايل اننا ناس تافهة عشان بنحب الكورة.. خليك فى حالك يا كابتن، إحنا كده!

فقط كرة القدم وأنيتا هنرى جوتنبرج القادرين على تشتيت انتباه اى شخص فى مصر، اللى الناس مش واخدة بالها منه اننا شعب "كروى" بطبعه.

رحمة رب الملحدين

الاسبوع الماضى او قبل ذلك بقليل كان لخبر بابا الفاتيكان وحواره الذى نقلته جريدة الإندبندنت إهتمام على الاقل من جانبى انا، فلم تكن تصريحات بابا الفاتيكان المرة دى عادية بل اثارت جدلا وضجة على صعيد الاوساط المسيحية فى الفاتيكان من رهبان وباباوات..

فقد صرح بابا الفاتيكان فرانسيس ان الملحدين ايضا يمكنهم دخول الجنة، واوضح البابا قائلا ان الملحدين واللادينيين شعائرهم ودستورهم فى الحياة هو إتباع ضمائرهم وإتباع الاخلاق الحميدة ومن يتبع منهم الفضائل المتعارف عليها بين البشر من الممكن جدا ان يدخل الجنة.. لأن رحمة الرب لا حدود لها وأن حتى هو شخصيا لا يستطيع القول او الجزم بأن الملحدين سيكون مثواهم النار.. لأن حسابات الله لا ترتقى لحساباتنا واهوائنا اشخصية وغيرتنا الدينية سواء مسيحيين او من اى دينا اخر، فيمكن ان يكون سبيل الملحد فى دخول الجنة هو طاعة ضميره الحى..

لو لغيت للحظة غيرتك الدينية فعلا، وبصيت للتصريحات دى بشكل حضارى وبدون اى تشويش من اى افكار متأكدة انها نطت فى دماغك وانت بتقرا الموضوع ده، هتلاقى ان ما قاله البابا هو ما يجب علينا جميعا فعله.. سواء انت مسلم او مسيحى، يعنى يعتبر من اكبر قامات الدين المسيحى منع عن نفسه شأن توزيع صكوك الجنة والنار.. مش حتى بقى لو مش من دينه، ده حتى لو مش مؤمن بوجود إله اصلا.. ماقالوش انت كافر، ماقالوش توب يابنى وارضى ربنا وبوس إيد أمك.. قال له انت ممكن تدخل الجنة.. مين يعرف؟ رحمة ربنا اكبر منى انا شخصيا!

لما تيجى تشوف ان التطور الطبيعى للحاجة الساقعة فى الشأن المسيحى ده من ايام الكنيسة السلطوية فى عصور الظلام وتشوف تصريحات بابا الفاتيكان المتفتحة هتعرف ان فيه أمل ان اى حاجة تتغير فى يوم من الأيام.. بس مش هتتغير هنا فى مصر أكيد، او لو فى يوم من الأيام هتتغير إحتمال كبير أنا وإنت وولادنا مانشوفهاش.. شوط كبير اوى لازم نقطعه عشان اصلًا تبطل تضطهد مسحيينك فى بلدك المسلم.. ويبطل المسلم يكفّر المسلم اللى مش مسلم على مزاجه.. إحنا فى بلد بنكره بعض بالفطرة!

ولما تشوف التعليقات على الخبر اللى انتشر على كذا موقع إخبارى وتقرا التعليقات.. يا دين النبى! مش ممكن! يعنى مثلًا؛

مستخدم 1: ده عشم إبليس فى الجنة يا بابا الكفاتس!!

مستخدم 2: رأيك إيه بقى يا عم البابا فى قضايا التحرش بالأطفال عندكم؟ ولا دى معندكش فيها ضمير حى؟

مستخدم 3: اللى مش مؤمن بيسوع يبقى مش من حقه يدخل الجنة اصلا يا ابونا! إخس على دى ايام إحنا فيها *تقريبا والله اعلم مستخدم مسيحى ساخط على البابا*

كله النور قاطع عنده وبيلوّش فى التانى.. محدش فيهم فكر لمرة فى حياته ان هو مين عشان يبقى عارف حسابات ربنا بالورقة والقلم؟ يعنى هما اللى قبلنا كانوا مصدقين فى المعجزات؟ واهى حصلت ايام الانبياء! محدش يعرف إيه اللى ممكن يحصل.. ربنا خلقك فى بيت مسيحى، وطلعت مسيحى.. خلقك فى بيت مسلم وطلعت مسلم.. على عيننا وراسنا وكل واحد يجب عليه ان يفخر بدينه واختياره الحر.. لكن ربك برضه اللى خلق الشخص الملحد اللى عايز تموته وتمحيه من على وجه الارض.. سؤال؛ الله سبحانه وتعالى مش قادر يمحيه هو فى ثانية؟ قادر طبعا!

يعنى واحد زى البرت اينشتاين ده.. معروف انه كان ملحد.. شوف عمل إيه للبشرية وفادها إزاى، وحضرتك مش عايز تروح الشغل كل يوم وبتخلص شغلك بسرعة عشان عايز تلعب بلاى ستيشان، وبعدين تقعد وتتمطع اوى وتقول ده ملحد ده اكيد داخل النار.. إنت مين اصلًا؟ ما تخليك فى حالك وحاول إنت يا مؤمن تعمل ربع اللى عمله وبعدين نقعد نتكلم بقى مين رايح فين فى الاخر!

 

كلامى قد لا يكون منطقيا او مقنعا بالنسبة للكثيرين.. لكن الأكيد والمنطقى والذى لا غبار عليه ان رحمة الله تشمل خلقه جميعًا.. بغض النظر عن الدين والجنس واللون والتفكير..

كتاب المرقعة الفارغة

لم يكن هذا هو العنوان الذى تمنينه لمقالى، لكن العنوان الحقيقى او بمعنى اصح الكلمة البديلة لكلمة "مرقعة" لم تكن ستساعدنى كثيرا.. كل ما سأناله بعدها إما زعيق فى نص المكتب من مديرى او مثلا لو كان رضى ينزلها يبقى هيترفع عليا قضية خدش حياء الرأى العام.. رغم انها كلمة مش خادشة على اد ما هى بتوصف الحالة اللى انا هتكلم عليها لكن مش مشكلة.. مرقعة ستفى بالغرض.

 

كنت اجلس انا وصديقة نستعرض بعض من مواقف المقربين، ومواقف الناس عموما، وجدنا ان كل ما يربط الناس ببعض هى المرقعة فقط لا غير.. وعلى الرغم من إختلاف الشخصيات والناس إلا انهم برعوا فى استعمال نفس قواعد المرقعة الفارغة.. هى هى نفس الحركات بالكلام مع اختلاف المفردات اللى كل شخص فينا بيستعملها.. 

من الامثلة الحية للمرقعة الفارغة؛

شاب فى منتصف العشرينات، مشي من شغله اللى كان فيه والمفروض انه هايروح يتقدم لواحدة.. بدل ما يُفرك ويقطع نفسه انه يدوّر على شغل، فضّل انه يهدى اعصابه من "السترس" ويروح الجونة او شرم او اى حتة من الحتت الحلوة دى لمدة 3 شهور.. اه والله 3 شهور بيهدى اعصابه

مرقعة دى ولا مش مرقعة؟

فتاة برضه فى العشرينات.. قاعدة ليل نهار بتدور على شغل.. اى شغل، ولما يجيلها شغل كويس بمرتب محترم وهى لسه متخرجة تقرر انها مش هو ده اللى عايزاه.. هى عايزة حاجة تانية، إيه هى بقى؟ هى نفسها مش عارفة هى عايزة إيه.

مرقعة دى ولا مش مرقعة؟

شاب إبن ناس لطيف وظريف.. بيحب واحدة وهى كمان بتحبه.. لكن علاقتهم غير واضحة المعالم والملامح، تقول له ماتيجى نتكلم فى اللى إحنا فيه ونحاول نخلى لعلاقتنا شكل ومعنى يقول لها إف بقى.. انا عليا ضغوط كتير مش قادر اتكلم.

مرقعة دى طبعا معروفة يعنى!

يبقى عندك "ديدلاين" زى حالاتى كل اسبوع.. وعارف ومتأكد انت هتسلم إيه وجاهز بأفكارك وكلامك وكتابتك.. تفضل مرحرح وتزنق نفسك على اخر وقت وتتشنج بقى وتسلمه قبل انتهاء ميعاد التسليم بساعة او نص ساعة..

مرقعة فارغة وإستهبال.

حد طول النهار قاعد بتفكر له فى مصلحته، وتقول له يعمل إيه ومايعملش إيه.. وفى الاخر هو مش بيبقى سامعك اصلا ولو سامعك ومقتنع بكلامك مش بينفذ اى حاجة من اللى اتكلمتوا فيها..

هى بعينها المرقعة.. ماتفكرش فى تعريف تانى.

المذهل فى المرقعة دى، إنها إسطمبة واحدة وماشية مع الناس كلها، يعنى المرقعة العاطفية معروفة بكلامها بسيناريوهاتها يعنى مثلا الجملة الشهيرة بتاعت "المشكلة مش فيكِ! المشكلة فيا انا! انا اللى مش فاهم نفسى ولا فاهم مشاعرى!".. إحلف كده؟ بجد والله مش فاهم نفسك؟ حظ اوفر المرة القادمة!

مرقعة الشغل برضه هى هى فى كل حتة، نفس الرحرحة نفس الـ"اوف بقى انا ماليش مزاج اشتغل انهاردة" "أنا حاسس انى مكانى مش هنا.. المفروض ابقى موجود فى مكان احسن".. مكانك مش هنا فعلا.. إنت مكانك فوق!

مرقعة المرفهين بقى دى اللى بتفقع المرارة.. "بابى جابلى هامر بدل مينى كوبر اللى كنت طالباها".. الشغالة الفيلبينية مش بتنطق الإنجليزى صح! اوه مون ديو!

مرقعة الصحاب هى كمان عبارة عن سيناريوهات من اللى خلتنى فى نص كلامى مع الصديقة اقولها "ايوة! هو كده بظبط!!" بس طبعا مع إختلاف اسماء الاشخاص..

الخلاصة فى كل ما قرأته او كل ما ستراه من مواقف مرقعة فى حياتك.. ان يا عزيزى كلنا متمرقعين، بطريقة او بأخرى.. ودى حاجة مش عيب! بالعكس! على الاقل هتبقى عارف ان بتتمرقع فى إيه.. وقواعد المرقعة الفارغة دى هتعلمك تتمرقع على مين عشان مايبقاش شكلك وحش.. هو كتاب وماشيين عليه، الجدع اللى يبتكر ويفكر فى قاعدة جديدة يكتبها بإسمه فى كتاب المرقعة وإحنا نصقف له ونقول له "يابن اللعيبة!! حلوة دى!".

دراما إفرى وير!

 كل اللى بقى حوالينا مؤخرًا بقى عبارة عن دراما مركزة وبجرعات مكثفة وفوقيها شويِّة حاجات فوق بعض، تقريبًا المسلسلات التركى نضحت على الناس من كتر ما بقى ليها جمهور عالى فى مصر حتى بعد ما الناس خدتها الشجاعة وقاطعتها بقى فيه مسلسلات مكسيكى ويابانى والناس تتابعها عادى جدًا.

بس الدراما بقى اللى على حق واللى الحكاوى بتاعتها لا تنتهى مهما الدنيا اتغيرت: الدراما العاطفية.. تقعد تسمع للناس كده سواء الناس اللى مصاحبة ولا مخطوبة تحس إن لأ.. أكيد لأ! مفيش حد بيعمل كده فى نفسه ولا فى الناس! والدراما دى مع الانتباه للحكايات اللى بأسمعها لقيتها منتشرة طبعًا طبعًا دون نقاش بصورة كبيرة جدًا فى البنات، والجديد بقى إنها بقت فى طريقها للانتشار بين الولاد كمان.. والمشكلة إنهم بيقعدوا يعملوا الحبتين دول ويرجعوا يضايقوا ويقولوا هما ليه بيعاملونا بقرف كده وسابونا.. ما هو من اللى بتعملوه!

هل طبيعى مثلاً، إن واحد ابن ناس محترم وشاب يعنى يملا العين، لما صاحبته تتخانق معاه يقعد يعمل فيها مغمى عليه؟ لأ بجد مغمى عليه ويقعد يتنفس بصوت عالى كده كإنه بيطلّع فى الروح! فى الأول البنت كانت بتتخض.. وقوم وأنا آسفة وحقك عليا.. مع الوقت عرفت اللعبة الهبلة اللى بيلعبها فى كل خناقة ولما اتفقس مبقاش بيغمى عليه وهى طبعًا سابته.. لأ وزعلان كمان إنها سابته!

طب بلاش، هل طبيعى إن بنت برضه ماتتخيّرش عن الشاب اللى فوق، جميلة وظريفة ودمها خفيف وبنت ناس كل ما تتخانق مع خطيبها تخلّى صحابها يكلموه يقولوا له إلحق دى بتحاول تنتحر وتقابله تانى يوم مش حاطة ميك آب فى وشها ورابطة إيديها وقال يعنى شرايينها مدلدلة وحالتها خطيرة؟

طيب خُدوا دى، واحد يفضل يتصل بواحدة وهى متردش ولما ترد تكون بتتكلم بطريقة مش لذيذة وتقول له لو سمحت متتكلمش على النمرة دى تانى أنا مش حابّة أتكلم معاك يقوم هو باعت لها تانى يوم "إنتى مضايقة من حاجة؟" طب ينفع بنت تفضل تزن على ولد علشان يكلمها ويحبها وهو يقول لها يا ستى حلّى عنى وهى تقول له "طب ما تحاول تحبنى!".. جرى إيه يا عيال مالكم بجد؟!

المهم إنكم ممكن تقولوا إن الحكايات دى مثلاً لشباب مراهقين هرموناتهم مش مستقرة، لكن المصيبة الأكبر إنهم مش مراهقين وكتير من النماذج اللى كلها حقيقية وذكرتها فوق ناس معدية التلاتة وعشرين والخمسة وعشرين.. كُبار وعاقلين يعنى المفروض...! غير طبعًا بقى اللى بتروح عند بيت صاحبها أو خطيبها وتقعد تعيط! أو مثلاً متخانقين تروح باعتاله رسالة تقوله إن فيه ناس بيجروا وراها بيحاولوا يخطفوها علشان يضطر يرد عليها! أو مثلًا اللى بيعمل إن أمه تعبانة أو أبوه فى المستشفى علشان تروح وتشوفه وفى الآخر بابا يطلع ودانه مسدودة علشان الميه دخلت فيها وهو بيستحمى!

اللى المفروض يبقى طبيعى عند كل الناس، حتى لو يعنى خلاص بتموت فى الشخص اللى قدامك وبتحبه حب قيس وليلى، لو لاقيت منه إحساس بالرفض خلاص بتاخد خطوة لورا وماتحاولش تقلل من نفسك.. ساعتها بقى تروح تعيط فى البيت وتشغل خالد عجاج أو تخش دوامة الشغل تداوى جراحك من غير ما حد يشوفك، لكن على الأقل تبقى محافظ على شكلك قُدام الشخص ده! وكرامتك يا عم.. كرامتك يا حاجّة، احترموها وإدوها شوية برستيج كده!

عارفين سابوكم وبيسبوكم وهيسيبوكم ليه؟ علشان تافهين وهُبل وحركاتكم مفقوسة وعلشان مبنحبش الدراما، إلا إذا كان ربنا بيحبكم بقى ولقيتوا حد درامى زيكم.. يبقى كده ربنا بيخلص منكم فيكم!

ملحوظة: هذا المقال نُشر فى العدد الـ34 من مجلة 7 أيام.