لما ركبت مع سواق التاكسي ده بالذات عرفت إزاي إحنا مش حاسين بالناس .. ممكن دا يكون بيحور عليا في قصته , بس مأظنش كان برضه كذاب في انفعالاته ولا كذاب في المرارة اللي باينة ف كلامه ..
" يعني مثلا الانسة اللي نزلت دي ... راكبة من المنشية لحد سموحة هنا و عارفة مدياني كام ؟ 5 جنيه , بس ولا هتكلم معاها عشان مقلش من نفسي و ربنا اعلم بحالها برضه .. بس لازم هي كمان تحس بيا و بالدنيا الزحمة اللي موقفة حال الواحد .. استغفر الله العظيم من كل ذنب عظيم .. إنتي عارفة حضرتك ؟ انا هتكلم معاكي عشان إنتي وشك سمح و انا لو متكلمتش هطق .. هيحصلي حاجة , يضايقك لو إتكلمت ؟ "
قلتله لأ طبعا , انا مبحبش اللك بطبعي بس فعلا الراجل كان شوية و هيطلع نار من فتحة مناخيره من كتر ما هو مضايق و قرفان .. مش هيضر لو سمعته الربع ساعة دي ..
" انا عندي تلات بنات و ولد ... البت في ثانوية عامة و الراجل المدرس الضلالي بتاع العربي بياخد 240 جنيه في الشهر عشان قال إيه مشهور و ف سنتر , ولا التاني اللي بياخد 40 جنيه في الحصة و بيديها في البيت و بتحايل عليه محايلة انه يقعد معاها نص ساعة زيادة .. هي الناس دي ضميرها مبيوجعهاش ؟ .. اقولك ؟ سيبك من دي عادي مصاريف ثانوية عامة ... الواد إبني جاب مجموع كبير ماشاء الله .. و فرقت معاه على هندسة على تلاتة من عشرة .. يوميها البيت كله قعد يعيط .. قلتله يابني ولا يهمك خش علوم قسم بترول ولا حاجة .. قاللي لا يابا غالية .. قلتله يا سيدي ملكش دعوة انا هبيع اللي ورايا و اللي قدامي .. راح يسأل قالوله 10000 جنيه "
بغبائي و رفاهيتي الفشيخة قلتله ياه 10000 في الترم كتير فعلا .. قاللي ترم ؟ 10000 جنيه ؟ في السنة يا انسة في السنة .. اتحرجت .. اوي !
" المهم راح الاختبار ولا مش عارف إيه ده .. هو قبليها قالي يابا متعرفش حد او كدة عشان اكيد هحتاج واسطة .. قلتله يابني ده تعليم واسطة إيه بس و بعدين انا ماليش غير ربنا .. و راح و الراجل سأله لو معاه كارت من حد و لما قاله لأ يأله طب ابوك بيشتغل إيه ؟ قاله سواق تاكسي على باب الله ... بعديها بيومين عرف إنه متقبلش ... و دخل علوم كيميا , مبيحبهاش بس دخلها عشان خاطري .. كان نفسه في هندسة "
" إنتي عارفة ؟ انا مرة و الواد ده ف ثانوية عامة مراحش الدرس عشان مكنش دفع الفلوس و انا كانت الحالة مقشفة خالص , عارفة عملت إيه ؟ بعت دمي .. و الله و كتاب ربنا ده يا بنتي بعت دمي و إديته فلوس الدرس عشان يروح .. الانيل بقى انه جاي يقولي عايز يخطب حبه القديم لقاها معاه في الكلية .. انا ناقص ؟ بذمتك انا ناقص ؟ دي لما قابلتها و قالتلي إزيك يا بابا قلتلها بلاش الكلمة دي عشان بتقفلني من الحياة "
حكاياته مخلصتش بس قلت كفاية عليكو كدة عشان انا عارفة فيه ناس نفسيتها بتتعب بسرعة و مبتحبش تسمع الكلام ده عشان ياي ..او عشان اوية يعني تعمل إيه ؟.. بس كل اللي عرفته من كل الحاجات اللي قالهالي ان فيه ناس مش عايشة , ناس مدفونة بالحيا و عمرها ما هتعيش ..
أمال ولاد العرص فالحين لما نقف عند المنطقة الشمالية والعدد يزيد وبنطالب بحقهم فى الدنيا ..بيكونوا هما أول ناس تشتمنا أننا موقفين السكة ليه ؟ مع أن فى ناس مننا بتحاول تعديهم ..لكن مافيش فايدة ..الخلاصة إن فى ناس عايزة تعيش كده ومستنية غيرهم يخلوا عندهم دم ويبقششوا عليهم ..أحا
ReplyDeleteأبشرك انتي مسمعتيش حاجة أصلا ، تقريبا نفس الحوار ده حصل معايا و نفس المأساويات بس السواق كانت مراته لسه مخلفة ، و راح ضربها في المستشفي بعد الولادة علشان مش حمل مصاريف و قبل ما أنزل قالي بالظبط ( باشا هقولك حاجة بس و النبي ما تزعل مني ؟ عارف السلسلة اللي في رقبتك دي ، دي تأكلني انا و الولية و العيلين شهر كامل )
ReplyDelete