Tuesday, April 17, 2012

ربنا يشفينى

هو انا تقريبا اتجنيت او بقيت مخاوية تقريبا، اه و الله مش بهزر بقيت بحس انى بشخصيتين و الاتنين مختلفين عن بعض تماما.. معرفش إيه السبب ولا انا إزاى كده.. هو اكيد فيه سبب بس إيه هو مش عارفة.

يعنى مثلا اجى اركب تاكسى، ممكن مرة اخلى السواق يشتغلنى بمزاجى و يقولى اجرة اعلى بكتير من اللى بدفعها و بدفعها عادى جدا و معنديش اى مشكلة فى الاشتغالة اللى اشتغلهالى.. بس ده اشتغلك! اه ما انا عارفة و معنديش مانع.

تيجى بقى مثلا ابقى راكبة تاكسى و قول الاجرة 7 جنيه و انا اديته 10 و هو معهوش فكة يدينى التلاتة جنيه الباقيين، انا ممكن انزل افك ال10 جنيه او اخليه هو ينزل يفك او يفك من اى حد ماشى فى الشارع عشان قفلت معايا عالتلاتة جنيه دول.. طب يا بنتى هيفيدوكى ف إيه التلاتة جنيه ، دول بالعافية يجيبوا اتنين كرانشى شطة و لمون.. لأ مفيش راسى و الف سيف يديهوملى.. يقولى يا هانم معيش فكة و الله اقوله مشكلتك مش مشكلتى!

اى حد ياخد رأيى فى حاجة ممكن فى مرة اقول لأ، لو قالى بعديها بيوم هقول اه عادى.. فرقت إيه؟ معرفش هو انا كده و مزاجى جاى معايا ب أه انهاردة.. بقفل من حاجات بحبها فجأة و احس انى عايزة اعمل حاجة مش  بحبها عشان اعرف احس الحاجة اللى بحبها تانى.. فى إيه؟ لييه! *بصوت انفعالات شوبير*

2 comments:

  1. ده بقى تيبس التاكاسات كلها انتى قديمة اوى يا ميرنا و بعدين انتى اصلا بتكونى ما صدقتى وصلتى فتعتبريهم زكاة عن صحتك :D :D :D

    ReplyDelete
  2. ده انفصال في الشخصيه :D :D

    ReplyDelete