الموت

إيه اتخضيت من العنوان ؟ انا كمان بتخض من الكلمة ساعات , لأنها مقترنة بموت صديقي الله يرحمه و يغفرله و اللي انا لسة مقتنعة انه مسافر و جاي  يا إما انا هروحله .. و موت محسن الكلب بتاعي اللي ملحقتش اتهنى بيه ...

انا فاكرة في الموقفين دول انا عيطت قد ايه .. عيطت عشان مش مقتنعة إزاي حاجة تموت و مش هشوفها تاني , بسمع ان ناس كتير بتموت بس لما حد قريب منك يموت بيبقى الموضوع مختلف و بعدين وانا صغيرة كان عندي اقتناع ان العواجيز بس اللي بيموتوا …

بس بقعد افكر كدة ساعات ان الموت ده نعمة من نعم ربنا بجد , يعني انت دلوقتي عايش حياة مؤقتة و ماشي مقلق , هموت و انا نايم ولا اول ما اصحى .. هموت غرقان ولا حران ولا هموت من الهم ولا عربية هتشلني .. الفكرة مش هتموت ازاي , الفكرة انك هتموت و دي حاجة حلوة ! هتروح لحياة ابدية مش هتموت فيها تاني , و انت already عارف ان فيه 2 options  يا جنة يا نار و ده بإختيارك انت و رحمة ربنا برضه بتعمل شغل ..

هتبقى مع ناس نضيفة و مفيش رغايين ولا فاسدين ولا نصابين .. كل حاجة هتبقى مثالية ده طبعا لو رحت الجنة و لو برضه النار ما انت هتقعد مع الناس اللي شبهك اللي عملت نفس الحاجات اللي انت عملتها غلط في حياتك و ده شئ كويس لأننا دايما بنعاني في الدنيا اننا مش لاقيين حد يفهمنا ...

الخوف من الموت هو عباطة يعني .. خايف تموت ليه ؟ خايف متشفش اصحابك و اهلك تاني ؟ هتشوف ناس احسن و ممكن اهلك يبقوا معاك .. هو انا فعلا بفكر في حاجات غريبة , يعني انا هلاقيهم ازاي ؟ الدنيا هتبقى زحمة ده اولا .. ثانيا افرض تهنا من بعض حلني بقى لو لقينا بعض .. ثالثا هيشفوني كدة سلط ملط ! اكيد ليها حل يعني و بعدين محدش هيبقى فاضي يبص عالتاني .. رابعا الدنيا هتبقى حر يوميها و انا بفرهد بسرعة من الحر و مبستحملش انا كتير خامسا و ده مهم : هو فوق هيبقى فيه نت و كدة مش للتواصل مع الاحياء يعني لأ مع اللي ماتوا برضه و انت فين و في جنة كام و اجيلك ازاي و كدة .. سادسا : هستنى كتير اوي عشان اتحاسب .. عقبال ما كل واحد في الدنيا دي ربنا سبحانه و تعالى يحاسبه و متعرفش بقى كل واحد هيبقى معاه رقم ولا بحروف الابجدية ولا ايه ... ممكن ناس كتير تكون فاكراني بستهزأ و بتريق و تقولولي حرام و كدة لكن و الله انا بتكلم بجد كل دي حاجات بتيجي في دماغي لما بفكر في الحياة بعد كدة و يوم القيامة تحديدا .. طب هل هتبقى هي هي نفس الحاجات اللي هنا هي هي اللي فوق ولا ايه بالظبط .. عموما يارب يجعل يومي قبل يوم اي حد بحبه مش عشان حاجة بس عشان مش عايزة اعيط ولا حد يوحشني انا اروح و انتو تحصلوني و لو عرفت اقلكم ايه اللي فوق او تحت هقولكم مش هبخل على حد .. نحن السابقون و انتم اللاحقون !

Friendly Tips for Girls for a Happier Life

على قد ما فيه ولاد رخمة كتير برضو فيه بنات كتيييير رزلة و انا هبدأ بالبنات عشان محدش يقولي انتي عنصرية و بتهاجمي الولاد...

يعني من امثلة الرزالة ان معظم البنات بتقلق لما لما صاحبها ولا خطيبها ولا جوزها ينزل يسهر مع اصحابه و بتقوله لأ .. طب خدني معاك ... مدام انت مش عايزني معاك يبقى اكيد هتعملوا حاجة غلط ..

اول غلطة هنا : الاسطوانة العريضة من الزن الفظيع اللي جابت للراجل صداع من قبل مينزل و ممكن تخليه ميطقش نفسه و مينزلش و يقعد ف وشك و ساعتها ابقي قابليني لو قلتي بم حتى ولا حاولتي مثلا تخفي ف دمك ف التليفون عشان تلطفي الجو ... لو سمعتي صوت صفارة و تيييت تتيييت متتخضيش هو قفل السكة ف وشك بس مش اكتر

الفكرة هنا ان الموقف ده بيتكرر كتير و الغلطات كتير اوي ف الموقف ده من ناحية البنت .. اول حاجة بتبين قد ايه هي مفيش ثقة ف اللي هي مرتبطة بيه و عايزة تبقى هي رقيب عليه .. ياريت تصحي هو هرب من امه ليكي .. هرب منها لشريكة حياته مش خالتي بامبة

تاني حاجة بتبين لنفسها و ليه هو كمان قد ايه هي معندهاش ثقة ف نفسها نهائي .. هو اختارك انتي يبقى خلاص ليه النواح و انتي برضو اخترتيه ..

لو بقى حصل و نزل فعلا مع اصحابه تفضل ماسكة االتليفون .. انت فين ... مع مين ... بتعمل ايه ... على فكرة انا بيتهيأ لي اني سمعت صوت بنات

اول حاجة : كفاية زن ! انتي اصلا زنيتي و نبرتي ف ام الخروجة من قبل ميخرج ! ف ليه الزن كل شوية و هيفيدك بإيه انك تعرفي هو بيعمل ايه ف التو و اللحظة ؟

و بعدين صوت البنات اللي انتي سامعاه ده سامعاه ف مخك اللي مش ولا بد ... افردي صاحبة واحد صاحبه .. افردي اللي بتاخد الطلبات ... عرضيها يا  حلوة متكشكيشيهاش كدة ... الولد او الراجل محتاج براح محتاج يخرج مع اصحابه محتاج يحس انه لسة شباب محتاج يعيش سنين حياته بس هو اختار يبقى معاكي  يبقى متخليهوش يندم على الاختيار ده ... البراح ده بيخليه راجعلك فريش عنده طاقة ايجابية يطلعهالك ف صورة حب ف صورة هدية ف صورة خروجة ...  و ف نفس الوقت انتي كمان هتاخدي وقت براح :)

تاني موقف بقى .. نيجي نلاقيها قافشة و راسها و ميت سيف ميعرف بنت غيرها .. كأصدقاء طيب ؟ لاااااااء

تعالي هنا بقى ... انتي ايه مشكلتك ؟؟ مشكلتك انك بتغيري ؟ جرى ايه يا بت متمسكي نفسك شوية ... و بعدين هتغيري من ايه ؟ ان واحدة منهم تاخده منك ؟ لأ هو لو فعلا بيحبك زي مبيقول مفيش واحدة هتعرف تاخده منك .. هترتاحي لما يكلمهم من وراكي ؟ و يبقى منظرك وحش ؟  انتي كدة عبيطة .. بالعكس تتعرفي عليهم و تصاحبيهم تخديهم على حجرك عشان ميبقاش فيه اي قلق من ناحيتك ..keep your friends close and your enemies closer ... مع انهم مش اعداء ولا حاجة و انتي موسوسة ... عند حق في ان فيه بنات كلاب ... بس دي ترجعلك انتي اللي تخليه يتعامل بحدود و قبل كل ده حبك ليه و حبه ليكي هيفرق كتير ..متبقيش متحكمة كتير لأن الضغط يولد الانفجار و خللي ثقتك ف نفسك عالية و تكوني واثقة من الشخص اللي انت اخترتيه ... هو اختارك انتي من بين بنات كتير اوي ...ها اعصابك هدت شوية ؟

ديك البرابر و ست الحسن و الرزالة

اسابيع و اسابيع و انا بفكر و اخد رأي الناس و امخمخ ... هو يعني ايه جواز .. اضحك ما انت اهبل ..ما انا عارفة ان واحد و واحدة يتجوزوا .. مش قصدي المراسم و كدة .. قصدي على فلسفة الجواز ذات نفسها .. هل المفروض اتجوز عشان ابقة زوجة مطيعة ؟ هل المفروض عشان ابقى زوجة مطيعة اني اقول حاضر و نعم ؟ طب ثانية واحدة افرض انا مش موافقة على رأيك .. هل لكوني زوجة يديك الحق ان تبقى ليك اليد العليا ف اتخاذ القرارت ؟ ليه ؟ في حين ان انا اصلا اللي متحكمة ف البشرية .. استغفر الله العظيم هتكفرني ليه .. بس انا اللي بخلف الولاد و البنات .. عارف لو كان الراجل بيخلف الولاد و انا بخلف البنات كان الموضوع بقى قشطة يعني .. لكن انا بخلف الاتنين !

هل هي فلسفة الجواز تتمثل ف الزوجة المطيعة ؟ ليه الجواز مش شركة ؟ ليه التعامل على اني تابعة لزوجي ؟ انا عندي حياتي و هو عنده حياته و بيربطنا جزء من حياته و حياتي ... انا وحدي صاحبة اختيار قراراتي .. عايزة اشتغل قراري مش قراره .. ممكن اخد رأيه لكن مش إلزامي ولا إجباري اني اعمل بيه .. بس خد تعالى هنا .. قراري انا كمان اختياري .. انا مش متسلطة .. والله انا هقولك رأيي ف شأن يخصك .. عايز تسمع كلامي هيبقى لطيف مش عايز رأيي عادي يعني ايه المشكلة ؟ اما فيما يخص حياتنا المشتركة فهي موضع تفاهم كلمة منك على كلمة مني و ف الاخر هنوصل لحل .. لكن المشكلة ان صعب واحد يبقى كدة ... و واحدة كمان ... الولاد عنده احساس انهم كلهم نجوم .. ليه يعني يا كابتن عندك حاجة لامؤاخذة مش عندي ؟ طب ما انا كمان عندي حاجات مش عندك ! .. اما البنات ف الوضع اصعب .. يا اما عايزاه يبقى ابوها و اؤمرني يا إما عايزة تعيش احساس الام .. كأن لعبها و هي صغيرة بالعروسة البيبي مكفهاش ... متسيبيه يا رزلة ! عايز ياخد قرار يخص حياته لو رأيك معجبهوش ف عادي ايه المشكلة يعني .. انتي مش امه ولا هو ابوكي .. انتو شركاء ..انا مش بشتغل يبقى انا مهمتي شغل البيت و الذي منه .. ان و انت بنشتغل يبقى انا و انت ناخد بالنا من البيت ... هينقص رجولتك يابو الرجال ف شئ انك تقوم تعمل الاكل يوم ؟ الفكرة ان كلامي موجه للولاد اكتر عشان هما اللي بالنسبالهم اللي بقوله ده شئ لا يصدكه عكل .. و عارفة ان كل واحد بعد ميقرا الكلام ده هيتناقش معايا سنتين عشان يفهمني المعنى الحقيقي للجواز اللي انا طبعا مش فاهماه بس انا لو مكنتش طلعت وجهت نظري دي للناس كان ممكن انفجر .. و يلا انا مستنية الفلاسفة العظماء يفهموني غلطتي ف اللي انا بقوله او من البنات اللي هتحاول تخليني افهم المعنى المقدس للزوجة المطيعة كالحمل الوديع و لا بأس في الاستعانة ببعض الايات القرأنية عشان اللي عليا ده يطلع  .. بس كل اللي اقدر اقولهولكو وفروا طاقة النقاش معايا لشئ مفيد تاني ... عشان ناس جربت تفهمني معنى الجواز " اللي بجد " مش "الهبل" اللي بقوله ده و مقدروش ...

الحرية تعني المسؤلية , لذا يخشاها معظم الرجال – فرانكلين د. روزفلت

الأنت

لأنت هو شئ عجيب له مقدرة هائلة زي مقدرة البوكيمون كدة على تغيير الاحوال و الاوضاع , الأنت ماشاء الله عليه اذكى اخواته , الأنت ممكن يجيبك ورا و ممكن يطلعك قدام , الأنت عنده قدرة و سلطة اكتر من اي شئ و كائن اخر , الأنت ممكن ينقذ العالم و ممكن يتسبب اننا كلنا نروح في ستين الف داهية , الأنت مهما حصله بيفضل عايش و متعايش مع اللي حواليه , الأنت لو محدش روضه و هداله اعصابه ممكن يطيح فيك و فيا و فينا كلنا ( الاسد فك الاسد فك ) , الأنت احسن من القطة و الكلب و سيد قشطة , الأنت ممكن ميكنش في قوة الاسد بس ممكن بذكاءه يغلبه , الأنت هو اساس الحياة اصلا مش المية زي ما بيقولوا ..

الأنت مش كائن خيالي لا احمر زي سبايدرمان و لا ازرق زي سوبرمان ولا علطول ف عزا زي باتمان ... الأنت مبيعرفش يطير بجسمه بس ممكن يطير بخياله , و ممكن طيران خياله ده يطير بيه ناس و بلاد و يخليها تحلق فوق و محدش يقدر يوصلها , الأنت هو الكائن اللي معظم او يعني غالبية دول العالم بتقدره و بتحرسه و بتخدمه إلا أحنا ..

الأنت ده هو الإنسان , هو انا و هي و نحن و هؤلاء , هو اللي بيقدر يعرف قدرة نفسه , هو اللي لو ذكي حبتين يتفتله بلاد , الإنسان هو اساس كل حاجة إحنا فيها دلوقتي سواء تطور اوتخلف علم او جهل حب او كره ..

الإنسان ربنا رب العالمين مديله خيوط اللعبة ف إيده بس قاله انت متراقب خلي بالك , يعني هتلعب بديلك كدة ولا كدة هجيبك من قفا امك , الإنسان اللي عمل اختراع دمر بيه ناس كتير هو ف نفس الوقت اللي حس بتأنيب ضمير فعمل جايزة لأي حد عمل حاجة يقدر يساعد بيها الناس ..

الإنسان هو اللي بنى امريكا و خلاها قوة عظمى و إحنا إنساننا عمال يفكر هل عمرو زكي بيضرب حاجة عشان جسمه يبقى كدة ولا هو ربنا منزله كدة و هل احمد فتحي هيمشي و يسيب الأهلي و يروح للنادي الانجليزي اياه بتاع كل سنة ده ..

هي الفكرة كلها ان لو الإنسان او الأنت عرف انه هو اللي بعد الله سبحانه و تعالى اللي ف ايده كل حاجة مش هيفضل مأنتخ و مفخد ليل نهار كدة , هي المشكلة كلها مشكلتين :

1-    الأنت اللي مش عارف قيمة نفسه : ده بقى لازم يقعد يعد على صوابعه اللي مش هيكفوا كل الاشخاص الفرادى اللي زيه اللي قدروا يغيروا حاجة فعلا زي اللي اخترع التلفزيون و اللي موقفش عند كدة و طوره و اللي اخترع العلبتين و بعد شوية بقوا تليفون , يفكر كلام ربنا و انه فضل " بني ادم " عن سائر خلقه

2-    الأنت اللي تايه و مش لاقي نفسه ف اي حاجة : اما ده بقى لازم يفضل يجرب مرة و اتنين و تلاتة و سبعتاشر و في كل مرة بتفشل بتتعلم حاجة جديدة تساعدك و تزود خبرتك في الحاجة اللي هتنجح فيها قدام و اللي ممكن تكون ابسط حاجة انت بتعملها بس مش واخد بالك

حب نفسك و اعرف الأنت بتاعك , اعرفه و افهمه و وظفه و متسنهونش بيه , لأنه بإيده يا يخرب عليك و عليا يا تلعبوا سوا سوا اخوات

البصبصة

اول طبعا متشوف كلمة بصبصة بالنسبة للولاد هتقولي ايوة و غيرة بنات و خنقة و قرف على دماغك هقولك لا يا حلو .. في فرق كبير بين البصة و البصبصة زي الفرق بالظبط بين الخيار و الاتة كدة .. يعني الخيار كويس و كلنا بنكله .. بس الاتة انا عن نفسي بحس احساس خرة لما باكلها عشان معفنة و بتقلد الخيار و لونها فاتح كدة .. ما علينا مش مشكلتنا

عشان نبقى واقعيين و منبقاش عايشين ف عالم اللا لا لاند كل الولاد بتبص لكن الاشخاص اللي مش ولا بد بس هي اللي بتبصبص .. البصة هي نظرة خاطفة كدة فاهم بجنب عنيك و مفيش حد مش بيبص لا ولاد ولا بنات .. كله بيبص بس البصة عادي يعني اصل اللي قاعد جنبي ده مش ملاك ولا نبي ده بني ادم .. بيحبني و بحبه و بنموت ف بعض و موسيقى الصعبانيات بس البصة مش معناها اني مش ملية عينه .. لكن لما ابقى قاعدة جنبه بقى و يبص عالبت و يغمز بعنيه و يبقى مش على بعضه و نظام انا رايح الحمام و يمشي المشية السكسي بقى قدامها عشان الاغراء دي تبقى بصبصة ..

نموذج حي قذر مثلا ابقى قاعدة مع اي حد من اصحابي ف كافيه و قاعد قدامي راجل متجوز و معاه مراته و ولاده .. الراجل يعني من كتر ما بص عليا و على صحبتي كنا هنولع ف مكاننا .. تنين بيبص مش بني ادم مش عشان احنا جامدين لأ عشان هو اللي عينه فارغة .. يعني انت مثلا مثلا عاجبك شكلنا و نضافتنا طب متخلي مراتك شوال الرز بلبن اللي جمبك تعمل زينا .. ولا خللي بنتك تعمل زينا .. و احنا لبسنا مش خليع ولا لبس ملهى ليلي .. لكن مراتك قاعدة جمبك لفة على دماغها طرحة المطلقين و وشها شاحب من كتر الوقفة على رجليها ف المطبخ ... طب مش مراتك دي يا عم و قاعد شارب واكل معاها ؟ متخليها تعمل اي حاجة جديدة ف نفسها و ساعتها لما تبصبصلها محدش هيقولك لأ ... ولا مثلا بقى اللي يبقى مصاحب او خاطب و يقولها اوعي تلبسي مش عارفة ايه و اوعي تلبسي ده و ده مفتوح اوي و ده ابن كلب اوي .. في ايه يا عم يعني انت تقولها كدة و تبقى عينك هتبظ عالبت اللي ماشية قدامك .. مهو يا إما اللي بيعجبك ف البت اللي قدامك دي تخلي صاحبتك او خطيبتك تعمله و يبقى منكو فيكو كدة يا إما تتلم و تحط بطيخة ف عينك و متبصش

لازم الولد او البنت اللي المرتبطين يبقوا مرتبطين بالشخص اللي عايزين يكملوا معاه حياتهم .. اللي يخرجوا معاه و يتفسحوا معاه و يضحكوا معاه و يعيشوا حياتهم فعلا معاه .. مش مجرد شخص هيبقى ابو عيالي و يصرف عليا و خلاص ولا ارتبط بواحدة ترقد عالبيض ف البيت و تربي العيال و انا مدورها برة .. الحياة مش كدة ولا عمرها هتبقى كدة .. لأن ده شخص يبقى وشك ف وشه ليل نهار .. و هي يعني لاموأخذة حياة واحدة اللي بنعشها مش بسبع ارواح احنا زي القطط .. ولا غلطانة انا كدة ؟

حية براح يا ناس

بقالي كتير اوي مكتبتش .. الحقيقة وحشتني الكتابة بس انا مرضتش اني اكون بكتب اي حاجة و خلاص يعني لازم كلامي يكون مهم و ليه معنى لأن تأثير الكلمة اقوى من تأثير السلاح ..

الموضوع ياخوانا يتلخص ف كلمة واحدة هي " البراح " .. هتقولي يعني ايه براح ! هقولك انا .. يعني خليني اشم نفسي ! احنا لما بنتكلم عن الحرية عامة و ده لاحظته كتير خاصة ف مفهوم الحرية في الوطن العربي لقيت ان معنى الحرية مرتبط بمعنى قلة الادب و اوبا يالا اقلع و اشرب يا معلم .. حتى بالنسبة لنا احنا كشباب مفيش بنت مثلا قالت لمامتها يا ماما انا حرة غير لما مامتها قالتلها اه ما انتي عايزة تمشي على حل شعرك .. كذلك بالنسبة للولاد يا بابا انا حر ابوك يقولك انت فاكر عشان كام شعرة نبتت ف دقنك خلاص كبرت و بقيت راجل ... كأن الحرية هي ان الواحد هينحرف ..

الحرية حلوة ! لكل الناس .. يعني اللي بيطالبو بالدولة الدينية و منع الاختلاط و و و .. مبصوش ليه على نماذج الدولة الدينية الاسلامية حواليهم .. ايران اللي كل شوية فيها حالات اغتصاب جماعية ! مهو طبعا الواد مبيشوفش غير امه ف لما يلاقي عباية ماشية قدامه غير عباية امه متوقع منه ايه ! ... بلاش كدة مبصوش على كمية الشواذ جنسيا ف السعودية ؟ مهو الشاب منهم هيعمل ايه مبيشوفش بنات خالص غير امه و اخته ...

طبعا لما حد يقرا كلامي ده هيقول انا بدعو للانحلال .. بس هو لما يكمل بقيت كلامي هيعرف اني ضد الانحلال بكافة صوره .. يعني انا مش ضد واحدة تتنقب ! و موضوع النقاب ده برضو شئ بيغظني جدا .. يعني مثلا كموقف انا امي كان فيه قناه معينة بتصور معاها .. و السكرتيرة بتاعتها منقبة .. جايبين كل الناس اللي ف المكتب و جم عند المنقبة و يقولك اصل مش هينفع .. طبعا انا اديت الخطبة اياها بتاعت احترام الحريات .. يعني دي واحدة هي كيفها تلبس نقاب .. يعني مش مضايقك المحزق و الملزق و بيأذي بصرك النقاب ؟ بيضايقك ان واحد مربي دقنه و لابس بنطلون قصير عليه جلابية .. برضو يضايقك ف ايه ما انت مبين لنا القلوب الحمرة اللي على البوكسر يعني و محدش بيقولك حاجة ... و طبعا شئ منرفز جدا لما نبقى رايحين مكان و يقولك متأسفين ممنوع دخول المحجبات .. طب و المحزقات الملزقات عادي ؟ يعني البت المحجبة دي الكلب عامل عليها بيبي مش من حقها تخرج و تتفسح و تروح و تيجي ؟

لازم ننشر ثقافة " خليك ف حالك " .. ملكش دعوة ده لابس ايه او دي عاملة ايه .. خليك ف حالك اي نعم انا معاك دي صعب تحقيقها بس لازم تتحقق .. نظرتك الشاذة المستغربة للبنت او الولد اللي قدامك ممكن تأثر فيه ... نظرتك المزدرءة للمنقبة يا بتاع الحرية على انها من القرون الوسطى مش من الحرية و الليبرالية اللي بتدعو ليها ... نظرتك يا مسلم يا متعصب يا متشدد للبنت اللي ماشية او الولد اللي ماشي قدامك مش من اخلاق إسلامك ..

و في الاخر تحية و تقدير سخنين لبنات و نساء السعودية على تفكيرهم في كسر حاجز القيود عشان يسوقوا عربياتهم ... انا عن نفسي معاكم قلبا و قالبا ّ! :)

نشنت يا فالح

حاجات كتير اوي و نصايح برضو كتير اوي امي العزيزة علمتهالي .. هي الصراحة لما قالتهالي في الاول قلتلها ايوة يعني المفروض اعمل ايه ؟؟ راحت بصالي البصة اياها اللي ساعتها بروح قاطمة الكلام و شكرا على كدة بعرف انها جابت اخرها مني ..

 من الحاجات اللي زمان اول ما قالتهالي و رديت عليها ايوة اكيد حاضر عشان اتفادى انها تبصلي البصة اياها .. اختاري الوقت المناسب  و الشخص المناسب لكلامك... لما قالتهالي كنت صغيرة شوية ف اللي هوة دخل الكلام من هنا و طلع من الناحية التانية .. لحد ما عرفت فعلا هيا كان قصدها ايه .. المشكلة اني مفهمتش قصدها غير لما اتحطيت انا ف نفس موقفها و بقيت مبستغربش لما تبصلي البصة اياها عشان انا كمان بقيت ببص البصة اياها ..

هو ممكن الشخص اه مش بيبقى قاصد و الكلام بيتطلع تلقائي بس النباهة مطلوبة برضك !! يعني من المواقف اللي عمري منساها مثلا و كان لسة من قريب يعني .. امي العزيزة بتتكلم مع ناس في الموبايل ف شغل و متنرفزة و قالبة الدنيا و انا بقى اللي طلع ف دماغي اني عايزة اقولها نكتة البغبغان .. فكان الحوار كالاتي :

امي " بتتكلم ف التليفون و متنرفزة" : انت ازاي تعمل كدة يا عمرو .. هو لازم انا اعمل كل حاجة بنفسي ولا ايه ( اعرفكم بعمرو .. شخص هادئ الطباع جدا و كل يوم اصحى الصبح على صوت امي بتكلم نفس الشخص اللي بيعمل كل يوم عملة اوسخ من التانية و اضطر اصحى انا من النوم) المهم امي راحت قافلة السكة ف وش عمرو و عدت فترة من الصمت كدة .. لقيت نفسي بقولها بمنتهى العفوية .. مامي مامي سمعتي نكتة البغبغان ؟؟ .. الحقيقة اني محكتش نكتة البغبغان و مش مضطرة اقول رد فعل امي العزيزة اللي بعذر رد فعلها و انا بكتب و بفتكر الموضوع ده .. هو انا ممكن مكنش غلط اصل يعني احكي النكتة لمين و بصراحة النكتة كانت حزقاني اوي و نفسي اقولها ..

و الوقت المناسب ده مهم اوي حتى عشان متبرشطش عالناس .. يعني انا كنت ف حفلة مغني معين انا مش فاكرة الحقيقة مين بالظبط بس اللي فاكراه الشخص اللي عكنن عليا اليوم كله .. البيه قفشت معاه يحكيلي مشاكله مع النحنوحة و احنا في الحفلة .. يعني انا مندمجة مع الراجل اللي نفس امه مقطوع عالمسرح و انت حبكت و حزقت معاك تحكيلي على مشاكلك دلوقتي .. هو الاول لما قالي انا مضايق مسمعتوش او بيني و بنكو عملت هبلة و مش من هنا و قعدت اقولو ايه ؟؟ بيتقول ايه؟؟ و عملت نفسي كأنو مقلش حاجة .. المهم ان هو برضو افتكر اني فعلا مش سمعاه فبدأ يعلي ف صوتو اكتر .. ميرنا انا مضايق .. قلتله: ايه انت اللي سايق ؟؟ سايق ايه يابني و برضو عملت هبلة .. المشكلة ان بعد محاولات عنيفة منه انو يسمعني انه مضايق مش انو سايق ولا متعايق قلتله و ده وقته يا عم ! بس المرة دي تقريبا هو اللي عمل اهبل و راح قعد يحكي و لوكلوكلوك لحد ما بقت ودني اليمين اكبر من الشمال .. هو ممكن مش غلطان و حزقاه المشكلة بس الرحمة حلوة يابا .. برضو فيه حاجة اسمها "sense" .. مهو نكد امك ده اللي طير البت من ايدك ..

اما عن اختيار الشخص المناسب بقى ف دي فعلا مشكلة كبيرة مبهزرش ! و مش محتاجة مفهومية .. اصل مثلا انت مش هتروح لسواق تاكسي و تسأله رأيه ف عرض البيبي " بلاك بيري" اللي منزلاه موبينيل .. مهو يا اما مش هيرد عليك و هيبصلك البصة اياها و هتحس اد ايه انت تافه .. او يا اما هيقف على جنب و ينزلك و يدعي عليك و يديك كلام من المنقي عن انك بتاخد فلوسك من ابوك و امك و هو طالع عين امه مع ناس غريبة و جي بتسأله عن البيبي .. او مثلا تروح تسأله عن مشكلة الرأسمالية و الاشتراكية الماركسية و تأثيرها على العالم الغربي .. ساعتها برضو هتعرض نفسك للبصة اياها .. يا اما هيحس ان الموضوع هيوسع منك و هيقولك انا ماليش لا ف الرقص ولا الشركسية ..

عشان مطولش اكتر من كدة و تقفشو علية .. انا برسيك بس ان النباهة حلوة و فكر قبل متتكلم و اعرف كلامك رايح فين و لمين و ربنا يكفيك و يكفيني شر البصة اياها :)

ملحوظة : مامي احب اقول لحضرتك ان فاتك فعلا نكتة البغبغان!!

أنا المرأة

انا المرأة التي طالما اضطهدت من رجال العرب .. انا المرأة التي طالما استخف بذكائها الرجال .. انا المرأة التي ولدت الرجال و ربتهم و جعلتهم اشداء يصيحون بها و يتعجرفون عليها .. انا المرأة التي كانت تعلم إبنها حتى بلغ اشده فإذا به يقول لها " إن الرجال قوامون على النساء " دون ان يفهم معناها .. انا المرأة التي تتحمل الام الحمل و الولادة دون ان تشتكي في حين لو شعر الرجال بألمي لخروا باكيين .. انا المرأة التي كان إبنها و زوجها يلجأون إاليها في حل مشاكلهم و يبكون في احضانها .. انا المرأة التي اطالب بحقي البسيط ف قيادة  سيارتي فيتهموني بالخيانة و العمالة .. انا المرأة التي يطلقون عليها الرجال ناقصة عقل و دين و هم لا يعرفون معناها .. انا المرأة التي تكبت من اجل ان يشعر الرجل برجولته و هو متحكم فيها .. انا المرأة التي يشك في قدرتها الرجال .. انا المرأة التي هي في نظر الرجال مثال للشهوة الجنسية .. انا المرأة التي تود لو سنحت لها الفرصة لتتقلد مكانتها الطبيعية بين نساء العالم .. انا المرأة التي يسلم لها الرجل ماله و عرضه و ابنائه و لكنه يخاف تسليمها منصب قيادي .. انا المرأة التي يتعامل الرجال معها كأنها رجس من عمل الشيطان و سبب الفتن دون ان ينظر لنفسه .. انا المرأة التي يتصنع الرجال انهم اعطوها كل حقوقها حتى يظهروا متحضرين امام العالم .. انا المرأة المتمثلة في شجرة الدر التي حكمت البلاد و قادتها الى بر الامان .. انا المرأة التي يدعون انها لم تحكم قط في التاريخ الإسلامي ... و لكني اشفق عليهم لأنهم لا يعرفون ست الملك الملكة الفاطمية و لا الملكة اروى ملكة صنعاء .. انا المرأة التي سوف تثبت لرجال العرب كم هم موهومين و يستحقون شفقة المرأة !

مطلق الريح

كتير منكم لما يشوف عنوان الموضوع مش هيقدر يفهم او يستوعب معنى " مطلق الريح " .. مطلق الريح دي تطلق مؤخرا على الشخص اللي بيفتي كتير او اللي هيفهمها و يستوعبها هيقولي انتي مقرفة ولا ايه .. هتقولي ايه العلاقة هقولك مهو الناس مش بتقول الشخص ده بيطلق ريح لأ هما بيقولو كلمة اوقع و معبرة اكتر بكتير بس نظرا انها ممكن تكون كلمة حساسة لبعض الناس انها تتقال علانية و ف مقال كمان ممكن يجيلهم صدمة عصبية .. فأنا تفاديت الموضوع ده و استبدلتها بكلمة مرادفة ليها من اللغة العربية الفصحى .. و لو انت او انتي برضو لسة مش وصللكو الكلمة ممكن تسأل حد من اصحابك او حد من اهلك و ساعتها هتقدر تبقى معايا عالخط ..

على ما اظن ان ناس كتير اوي عندهم الشخص ده ف حياتهم .. جزء لا يتجزأ من حياتي انا شخصيا و مش لازم يكون حد من اصحابي بس بقابلهم و انا بشتري حاجات من السوبرماركت .. و انا راكبة التاكسي .. و انا واقفة مع ناس اعرفها .. بس مطلق الريح دة انا نفسي اعرف مصدر معلوماته الخطير .. لما ركزت مع كذا واحد منهم اكتشفت المصدر الخطير ده و طلع " بيقولك او قالولي او سمعت " .. و فيه بقى اللي بيفحمني برده و يقولي دي واضحة وضوح الشمس انتي مش من هنا ولا ايه .. بس نظرية المؤامرة اللي اتشرت الايام دي كان ليها دور كبير في انتشار دور مطلق الريح و احساس الناس بأن فيه شئ خطير بيدور من وراهم و هما مش عارفينه ..

يعني من الحاجات اللي فعلا قعدت اضحك عليها كتير اوي .. انا كنت راكبة ورا ف التاكسي و فيه شخص راكب قدام و هو و سواق التاكسي مش عاتقين حد و هاتك يا لك و كلام فاضي بس اللي فعلا خلاني اطلع بضهري لقدام شوية و اسمعهم انو قال معلومة خطيرة جدا .. ان ايه بقى مصانع محمد رجب الموجودة ف سموحة موجود تحتيها انفاق ضخمة واصلة لحد اسرائيل عشان بتمدهم بأسلحة و ذخيرة و بيبسي !!!!!!!! فيه حاجة يا حلو ؟؟ فيه حاجة يا أمور .. و لما قررت اني اتدخل و اقولو عرفت منين قالي دي معلومة معروفة اوي و معظم الناس عارفاها و بصلي و همهم همهمات غير مفهومة .. لما قالي كدة اتأكدت اكتر انو بيطلق ريح كالعادة .. بس كان غريب جدا بالنسبالي تفكيره الرهيب اللي قدر يوصل للي موصلهوش الكتير من المعارضين مثلا !

و صديق عزيز كنت بتكلم معاه ف الموضوع ده قالي انو سمع برضو تقريبا و هو ف التاكسي ان قال ايه بقى ان شاطئ سان ستيفانو عملينو خاص مش عام عشان هما عاملين برضو نفس الانفاق متوصلة لحد الفندق عشان اللي جايين بسفن ولا حاجة يطلع على الفندق علطول .. الحاجة الاكيدة اللي عرفتها اننا لازم نلغي الانفاق عشان فكرة هلع الانفاق السرية اللي عند الناس دي تتلغي.. يا إما نلغي الناس يا نلغي التاكسيات  و ده قرار صعب جدا ..

ياريت بقى كل واحد من الناس الحلوة اللي كان ليها طقطان تقرالي كل ده اول متشوف واحد بيطلق ريح و حياة امك افصله عن جو الاثارة و التشويق و ام بي سي اكشن ده .. غير الموضوع فورا بدون تفكير .. سواء كان فيه انفاق او ممرات او اسلحة او ان وائل غنيم ماسوني او عميل او كان ممسوك ف قضية قبل كدة او ان البرادعي عنده فلات فووت .. عايز تنقض عايز تختلف خلي نقضك موضوعي و مستند على ادلة منطقية .. حاجة تدخل العقل يعني عشان احنا اتعمينا من مطلقين الريح بصراحة !!!

عشيني تلاقيني 2

فاكرين فوفة ؟  اخرمرة شفتها قلتلها اني لازم اقابل ابوها .. الحاج عوض ابو ريشة , هو حاج اه بس عمره ما شاف الكعبة غير ف التلفزيون .. فهمتها اني لازم اتكلم معاه هو و محمد  , مش لازم يقتنعو بوجهة نظري بس عالاقل يفكرو فيها , فاتن قالتلي انتي شكلك بيتهزري .. قلتلها يا ستي اديني هجرب .. قالتلي بس انسي الولا حمو..  ده كفاية اسمه  " المشلفط "  ف الحتة عندنا.. قلتلها المشلفط ؟؟ لأ ده انا كدة لازم اتكلم معاه و اعرف ايه اللي شلفطه , قالتلي مدام مصرة انتي حرة بس افتكري اني قلتلك بلاش عموما انا كمان يومين و هكلمك.. مكنتش قادرة مفكرش ف المقابلة دي , مش عارفة ايه اللي ممكن يحصل و لا ايه اللي انا ممكن اتكلم فيه مع الحاج ريشة  بس انا قلت هسيبها على ربنا و قررت اني اخد صديق عزيز معايا .. محدش ضامن ايه اللي ممكن يحصل و عشان لو حصل حاجة يتهورو عليه و يسيبوني انا ..

عدو اليومين اخيرا و فاتن كلمتني و قالتلي هنتقابل انا و انتي ف اي حتة و هنروح مع بعض مش هتعرفي المكان لوحدك .. و روحت قابلتها انا و صديقي العزيز عمرو , عدينا عليها اخدناها و ورت عمرو الطريق لحد ما قالتله بس هنا اركن بقى و ننزل نمشيها عشان الحتة كلها بلاعات و شوارع ضيقة و هنبوظلك العربية عالفاضي .. ركنا و نزلنا و مشينا مع فاتن .. كل العيون علينا و سمعاهم بقى " مين دول .. مين دول" .. و اللي طلع يجري افتكرنا حكومة معرفش ازاي , المكان انا مش عارفة اوصفه ازاي بس هو دهليز .. عايزين تمشو مجموعة اكتر من 3 فيه يبقى يا تمشو ورا بعض يا تمشو بالورب او بالعرض , طلع فجأة شخص معرفش ده جني ده ولا ايه

- الشخص العجيب : تبعك دول يا فوفة ولا يخدو اللي فيه النصيب

- فاتن : ايه يا سبع انت اتعميت ؟ مش شايفني جية معاهم يبقو تبعي طبعا

وصلنا للغرزة العتيقة .. و هي فعلا عتيقة , متعرفلهاش هي بني ولا رصاصي من التراب.. الكل بيبص علينا , اعصابي اتوترت و عمرو بدأ يعرق , دخلنا اخر ركن ف الخن , لقيت برنس الليالي قاعد .. الحاج ابو ريشة , قاعد و مستكنيص و قدامه حاجة شبه الشيشة و بيطلع نار من بقه مش دخان و بيهرش ف بطنه .. لسة بسلم عليه بقولو اهلا انا صاحب.. مكملتش الكلام لقيت فاتن بتوشوشني انا قلتلهم انك صحفية عشان يرضو يقابلوكي متبوظيش الدنيا عشان تروحي بتكو حتة واحدة .. و حمو زمانه جي دلوقتي

قعدنا .. حسيت اني  اتعميت من اللي بيشربه اللي انا مش عارفة هو ايه بس هو حاجة مش ولا بود .. باين من ريحته و تأثيره عليا انا و عمرو اللي اغمى عليه تقريبا ..

- انا : اهلا يا عمو .. اعتبرني زي بنتك مش عايزاك تحس انه حوار صحفي ولا حاجة

- ابو ريشة : بنتي مين ؟

ساعتها اتأكدت انه مش هنا اصلا .. لقيت صوت جاي من ورايا " ايه يا فوفة يا وس** كنتي فين كل ده " .. عرفت وش انه حمو

- انا : اهلا .. ازيك يا محمد , فاتن كلمتني كتير عنك

- حمو : محمد ايه انتي جية تفضحيني ف الحتة ؟؟ متحسبي على كلامك يا مزة

- انا : مكنش قصدي يا مشلفط .. مش اسمك ده برضو

- حمو : طب منتي حلوة اهو عمللنا فيها من بلاد برة ليه

- انا : محم.. قصدي حمو .. هو ايه اللي ف وشك ده ؟

- حمو : دي علامة الجودة ولا مؤاخذة .. اصل الولا ميغة ابن عوصة هزاره تقيل بس حبتين

- انا : ممم ... متقولي ايه احلامك يا حمو .. ايه اللي نفسك تعمله

- حمو : نفسي بقى اخد البت بوسي و نقضي ليل..

قبل ميكمل كلامه كانت فاتن حطط ايدها على بقه و بصتلي بإحراج كأنها بتقولي انا حذرتك

- انا : قلتله لأ فهمتني غلط خالص .. قصدي كان نفسك تتطلع ايه مثلا ؟

- حمو : كان نفسي ابقى بكتب .. قصص بقى و كتب والكلام دة

- انا : طب ليه مطلعتش كاتب ؟

- حمو : و مين قالك اني مبكتبش ؟ انا بكتب قصص ثئافية ..

- انا : ثقافية ازاي ؟ يعني بتتكلم عن ايه يعني ؟

راح غمزلي كدة و عدل ياقة الشئ اللي يشبه القميص اللي لبسه

- حمو : بتفرج على اباح.. فاتن بصتله , راح مكمل : يعني بقى قلة ادب و الذي منه .. العيال خرمانة .. اه والله خرمانة

 ماشاء الله لا كاتب فعلا .. دنتا الفاظك عايزة تتمرش " ده ف سري طبعا"  

- انا : طب عمو ..

حمو راح مقاطعني : اسمه عمي الحاج

- انا : عمي الحاج .. ايه رأيك ف المظاهرات و اللي بيحصل ف البلد اليومين دول

- ابو ريشة : بلد ايه ؟

ساعتها برضو عرفت ان مفيش ف امه امل .. مغيبب تماما

- انا : طب ايه رأيك ف حسني مبارك ..

- ابو ريشة : حسني حلو بس قافش شوية .. انتي عارفة يا بت ان حسني ده كان صول برضو مع عوصة .. بس هو اللي ربنا فتحها عليه و بقى طيار و بعدين بالكوسة بقى ريس

عرفت ان عوصة سرح بعمي الحاج لما اكل دماغه اكتر مهي متكلة.. بصيت جنبي ملقتش عمرو , اتنطرت من مكاني

- انا : امال فين ..    لسة مكملتش لقيت حمو بيرد عليا

- حمو : قصدك على الطري اللي كان معاكي ؟ تلاقي العيال ولاد ال %^&** بيلعبو بيه برة

- انا : بيلعبو بيه اه و مالو خليهم يلعبو .. طب ليه يا حمو مرحتش مع اختك المظاهرات ؟

- حمو : دي بت %$%^& مبتقوليش و هي رايحة عشان اروح معاهاا

- انا : طب كنت هتروح تعمل ايه

- حمو : على فكرة انا مش فهمك .. عايزة ايه يعني

- انا : حمو .. انت بتحب مصر ؟

- حمو : كان بودي و الله بس هي مصر مبتحبش اللي زينا .. اللي زينا اخره الكام سنة اللي بيعشهم و شكرا على كدة ..

- انا : طب افرض مصر بدأت تحبك .. بدأت تعملك كل اللي انت عايزه عشان تعيش عيشة نضيفة

- حمو : تصدقي بإيه يا ابلة .. انا بقولك ابلة عشان حبيتك , بس لو مصر عملت اللي قلتي عليه ده .. مش عارف اقولك ايه بس لدرجة اني مستعد ابيع البت بوسي و اجوزها هية

انتهت المقابلة و معرفتش اتكلم مع عمي الحاج اللي قام يهرش مش ف بطنه بس لأ ده ف كل حتى ف جسمه عشان عايز يتخمد .. بس اللي اتأكدت منه ان اللي زي "الحاج" ابو ريشة عايزله تلات سنين عشان يشيلو الجلاخة اللي ف مخه لكن المشلفط على قد ما قرفت منه على قد متعاطفت معاه و عرفت ان فيه منه 5% فايدة , ساعتها قلت لفاتن اني يدوب وضبت الزبالة المتكومة جوة عنده اللي هو مالوش ذنب فيها بس عليها هي التنضيف بالكلور و المطهر حتى لو قعدت شهور تنضف .. و اللي نفسي فيه ان كل واحد فينا فعلا يحاول على قد ميقدر يشيل جلاخته و جلاخة غيره , مينفعش تسكت و تقول انا مالي دي تاني .. اللي زي حمو اتكتب عليهم يعيشو متشلفطتين عشان انت تيجي تنضفهم ..

عشيني تلاقيني

الثورة قامت .. و نجحت الحمد لله .. اكيد اللي هينط ف دماغك اول متشوف كلمة ثورة ف المقال هتقول اه اديناها الفرصة انها تكتب هتروح كتبلنا ف السياسة .. هقولك انا اي نعم براحتي بس انا مش هتكلم ف السياسة كسياسة .. هتقولي اه اتفلسفي كمان و زهقينا .. مش مضطرة ارد عليك .. اقرا بس اقرا .. جميل اوي و شيئ رائع ان الثورة نجحت انا عن نفسي مبسوطة بس كنت بفكر كدة هل كل الشعب فعلا فرحان ؟؟ اكتشفت انه لأ مش فرحان .. اشخاص كتير اوي مش فرحانين و شايفين انها جية بخسارة عليهم  و ناس تانية مش حسة ان فيه حاجة حصلت اصلا.. وجهة نظر و تحترم اكيد .. بس انا عارفة للاسف انها مش وجهة نظر .. دي حالة طبيعية سببها النظام .. بقى الهم عالبطن .. اهم حاجة اكل و اربي ف كرش و ادخل انزل اللي كلته ف الحمام و كويس ان البت فاتن و الولا حمو بيعرفو يقرو .. هو مش عايزهم فلاسفة ولا مفكرين عشان الكلام ده مبيأكلش عيش .. صبي ميكانيكي ميضرش ابدا و البت فاتن مصيرها واحد ابن حلال محشش من صحاب الولا حمو هييجي يتجوزها و هكذا ..

و كان خايف ان اسوأ كوابيسه تتحقق وتتطلع البت فاتن نبيهة.. اصله من صغرها و هو مراقبها و هو رافع حاجبه و مستغرب انها بتعد من 1 لغاية 10 .. وكبرت البت فاتن و مش عايزة تخش محهد خدمة اجتماعية ..و للأسف عشان هوعشان نيته مش تمام مالبت فاتن .. طلعت البت نبيهة - كانت تيجي تقولو" بابا بابا مش انا طلعت التانية على الدفعة السنة دي !! "

- يقولها و هو قاعد بالفانلة السواريه و بيهرش ف بطنه " و ادوكي كام ف الليلة دي  " ..

- تقولو " ادوني جيد جدا يابا ! "

- يقولها " جيد جدا ؟ طب انجرري روحي اغرفي الاكل مع امك "

فاتن كبرت اكتر و بقت تنزل السيبر اللي تحت بتهم عشان تعد عالنت و تشوف ايه اللي بيحصل من حواليها ف الدنيا و جنبها الولا حمو بيتفرج على مواقع اباحية .. تطلع البت فاتن تحكي لأبوها اللي بيحصل و ان فيه ناس عايزين يعملو حاجة اسمها جمعة الغضب عشان اللي بيحصل ف البلد من فساد و ان حق الناس ضايع ف البلد دي  .. ابوها يبصلها و يكمل هرش ف بطنه .. يطلع وراها الولا حمو يحكي لأبوه اللي كان بيتفرج عليه ف السيبر .. يضحك ابوه و يقولو " يخربيت شيطانك يالا يا حمو .. جدع عايزك تتطلع راجل زي ابوك " ..

و ولعت البلد و حصلت المظاهرات .. و البت فاتن لقت ان لازم يكون ليها دور و قررت تنزل المظاهرات .. قامت الصبح و لفت الاشارب على وشها عشان الدخان  .. لقت ابوها صاحي ..

- قالها " رايحة تسرقي مين يا بت عالصبح كدة "

- قالتله " انا رايحة المظاهرات يا بابا " ..

- راح ابوها معلي صوته و قال لأمها " متعمليش حساب فوفة يا ولية عالغدا " ..

راحت البت فاتن التحرير و اخدت علقة حلوة بس ف الاخر قررت تعتصم ف التحرير مع بقيت الناس .. و رجعت البت فاتن بعد كام يوم البيت لقت ابوها على اخره و متنرفز و بيهرش ف بطنه بعصبية

-" كنتي طفشانة فين يا بت كل المدة دي ؟"

- قالتله " كنت ف التحرير يابا .. ادعي ان حسني يمشي و نرتاح بقى  " .. لقت ابوها اتبسط قالت احمدك يا رب الراجل فاق  ..

- قالها " تحرير ! طب مجبتلناش اكل ليه معاكي ولا انتي طالعة براوية زي امك "

البت فاتن استغربت ده الناس هناك مش لاقية تاكل ! اكل ايه اللي بيدور عليه .. و لقته بيدور ف شنطتها و بيقلبها ..

- قالها " ايه يا بت ده ! اوامك صرفتي الفلوس  ! "

- قالتله " فلوس ايه يا بابا ؟؟؟ "

- قالها " انتي مش كنتي ف التحرير؟ يبقى اكيد اكلتي فراخ و ادوكي فلوس  "

- قالتله " يابا دي اشاعات .. احنا بنعمل كدة عشان مصر .. عشان تبقى احسن ليك و ليا و لمحمد "

- قالها " مصر ايه يا دلع امك .. و عموما لو على مصر ف الولا حمو حافظ النشي "

- قالتله " نشي ؟؟ نشي ايه يابا "

- قالها " شوفتي الولا حمو اجدع منك ازاي ؟ النشي الوطني يا بايرة ! "

راحت البت فاتن التحرير تاني و قعدت كذا يوم و رجعت البيت و يارتها ما رجعت.. اول ما دخلت البيت لقت الولا حمو بيتفرج على الافلام اياها بس على لابتوب !!!!!!

- قالتله " منين ده يا محمد ؟ "

- قالها   " ابوكي عندك اسأليه و متصدعنيش "

 راحت فاتن لأبوها لقته ماسك اي بود و حاطط سماعات ف ودانه و بيهرش ف بطنه ..

- قالتله " ايه يا بابا ده ! انتو جبتو الحاجات دي منين ؟؟ "

 راح ابوها شايل السماعات و قالها " اما يا بت يا فوفة عباسط حمودة ده عليه اغاني  تظبط الدماغ من غير حشيش ..  "

- قالتله " يابا ! مترد على سؤالي ! "

- قالها " عارفة يا بت يا فوفه الدكانة الكبيرة دي اللي بتبيع الحاجات الغالية ؟؟ رحت انا و عمك عوصة الصول و جبنا الحاجات دي .. اصلهم كانو بيوزعوها ببلاش و جبتلك انتي و امك كام هدمة من عند سارة "

كل الكلام اللي حكيته ده بيمثل فئة كبيرة جدا من الشعب .. اهم حاجة عنده الاكل و الشرب و الحمام و الهرش فالبطن .. لازم ننضف عقولنا و عقولهم قبل مننضف شارعنا و شارعهم و نعمل ماراثونات .. لازم نفهمهم ان البلد بتتغير و مش وقت هرش فالبطن .. و انك تنضف عقولهم دي محتاجة انك تنزل بعقلك لعقلهم و تعرف تفكيرهم .. تفهمه و تقيمه و تحاول على قد متقدر ترفعه معاك لفوق عشان نعرف نرفع مصر لفوق  ..

و عشان كدة انا مقدرتش استحمل اني  مقابلش الحاج ابو حمو بس أمنت  البت فاتن امانة اني  لما اروح اقابله يبقى ساتر نفسه بحاجة فوق الفانلة اياها ..

الفصيل

فكرت كتير اوي بقى قبل ما حتى اعمل بلوج .. اصل هكتب فيه ايه يعني ؟؟ بس بعد اقتناعي برأي صديق من احسن شخصيات قابلتها قلت خلاص انا هكتب .. اصل معلش يعني القذافي يكتب الكتاب الاخضر اللي هو الدستور في ليبيا و انا مكتبش؟؟ ليه ؟؟ وحشة ؟ صغيرة ؟ ده انا حتى اعقل منه ! و بعد كدة شفت بقى الصفحة بتاعت الذكر و الانثى اللي ف الكتاب الاخضر حسيت بحماسة و الهام .. فكرت كتير قبل مكتب الكلام مشكلات كتير قعدت افكر فيها قبل مكتب او بمعنى اصح بفكرلي ف مشكلة تمنعني من الكتابة .. حاجة زي اعقل يا مجنون كده

اول حاجة : ايه الموضوع اللي ممكن اكتب فيه .. المهم لقيت

تاني حاجة : طب مهو محدش هيقراه .. دي بقى سلمت فيها امري لصوابعي و لربنا

تالت حاجة : و ده بقى الموضوع اللطيف اللي هتكلم فيه .. الفصيل

تعريف الفصيل : كائن يعيش و يتعايش و يتلذذ بفصل الاخرين عن الجو العام اللي عايشين فيه

الشخص الفصيل يعتبر معوق من معوقات النجاح .. و المشكلة ان الاشخاص " الفصلاء" في تزايد مستمر .. بس انا اللي نفسي اعرفه .. ليه يابن الحلال كدة ؟؟ مدفوعلك كام يا حبيبي ؟؟ و لو مش مدفعولك طب بتعمل كدة ليه ؟؟

مين مننا مش بيقابل شخص فصيل ف حياته .. و مش هقعد اقول بقى اصلها مش مشكلة شخصية و انا يتكلم عن مشاكل افراد المجتمع و ابقى مخبية كلاكيع جوايا .. لأ انا بقى متضررة اوي من الموضوع ده

يعني ايه مثلا شخص موهوب ف حاجة معينة .. نقول الشعر ماشي .. قاعد ف حاله مع قهوته مع قلمه و الورقة بتاعته و سرحان بقى و مستني الوحي الالهي ينزل على نافوخه .. يلاقيلك صاحيبنا الفصيل داخل عليه يقولو ايه يا عم تيمو متخف شوية انت هتفتكر نفسك ايمن بهجت قمر ولا ايه .. يقوم الشخص الموهوب سايب قلمه و يلعن ابو اليوم اللي فكر يكتب قيه شعر و يفتكر شعر صدر تيمو بكلام صاحبه و يفصله عن الجو العام .. و نظام بقى ايه اصل شفت مش عارفة مين بيكتب شعر هاهاهاهاه .. طب لية يابن الرزلة اللي عملته ف صاحبك ده ؟؟ ولا حياة لمن تنادي ..

انا عن نفسي حصلي مواقف زي ديه كتير اوي .. اجي اصلي مثلا القيلك الشخص الفصيل المتمثل في هيئة ذكر او انثى على رأي عمكم القذافي و يقولي .. ايه يا ست الشيخة متدينا من بركاتك شوية .. اصل هو لو كدة روش ف مصطلح روش انتهى من زمان .. و لو فاكر نفسه نجم فبرضو يا حبيبي انت فاهم النجومية غلط خالص

بس على المستوى الاجتماعي هتلاقي ان الشخص الفصيل ده كان يعرف سابقا بالشخص الهدام .. هو ممكن مبيخدش فلوس على اللي بيعملو في الناس ولا بياكل كنتاكي و لا حتى عنده اجندة .. بس هو كدة .. نازل من بط امه كده

يعني مثلا اجي اقول رأيي السياسي ف اللي بيحصل اليومين دول الاقيلك صاحبنا بسحنته و رزالته المعهودة يقولي و انت تقولي رأيك ليه اصلا ؟ خلاص بقيتي ميرنا البرادعي .. طب ما طبيعي اني اقول رأيي يعني الله !!!! و بعدين مضايق متتكلمش و لو اتكلمت مترزلش او متفصلش .. خفيف خفيف كده يعني ..

و برضو كنت ببص في الحاجات القديمة اللي عدي في الفيسبوك بتاعت اول ايام الدعوة للثورة .. لقيت منهم كتير اوي !!!!!!!! اللي يقولك انتو فاكرين نفسكو هتعملو حاجة ؟؟ ابقو قابلوني ..

و المشكلة الاكبر اني متأكدة اني هلاقي منهم كتير اوي اول ما حد يشوف الللي كتبته ده .. اللي هيقولي انتي صدقتي نفسك عشان الثورة ولا ايه .. و اللي هيقولي اي الدروس المستفادة .. و اللي هيقولي و انت بتكتبي ليه فاكرة نفسك مين ..

بس بعد تفكير عميق وصلت لرد مناسب للاشخاص ديه هو : ازيك و ازي امك يا فصيل يابن الفصيلة مهو مدام مش مدفعله يبقى اكيد وراثة ! .. احساسي الداخلي بيقولي انو هيسكت .. بس فعلا انا نفسي صوتي يوصل لكل رزيل و رزيلة و فصيل و فصيلة .. حاول تبطل الطريقة السخيفة دي ! اصل الكلمة الطيبة حسنة .. و بعدين يا سيدي مش عجبك خلاص كبر دماغك و ميهمش انك تعلق .. انت ممكن طول حياتك تفضل شايل ذنب انسان انت احبطته .. هتقولي مهزرش يعني .. لأ هزر يابن الرزلة بس متحبطش حد .. يا سيدي هزر و بعدين قول للشخص اللي فصلته ده بعد هزارك كلمتين حلوين يمكن تبقى انت السبب ف ان الشخص ده يعيش حياة افضل بكلمة منك .. و ممكن انت متبقاش شايف رأيك مهم اد اية بالنسبة للشخص ده و يديلو دافع

 و اخيرا .. و حياة امك و ابوك متفصلني انا شخصيا .. مش عجبك احتفظ برأيك لنفسك

This was my very first article i wrote ... Written : February 23th 2011 :)