إيه اتخضيت من العنوان ؟ انا كمان بتخض من الكلمة ساعات , لأنها مقترنة بموت صديقي الله يرحمه و يغفرله و اللي انا لسة مقتنعة انه مسافر و جاي يا إما انا هروحله .. و موت محسن الكلب بتاعي اللي ملحقتش اتهنى بيه ...
انا فاكرة في الموقفين دول انا عيطت قد ايه .. عيطت عشان مش مقتنعة إزاي حاجة تموت و مش هشوفها تاني , بسمع ان ناس كتير بتموت بس لما حد قريب منك يموت بيبقى الموضوع مختلف و بعدين وانا صغيرة كان عندي اقتناع ان العواجيز بس اللي بيموتوا …
بس بقعد افكر كدة ساعات ان الموت ده نعمة من نعم ربنا بجد , يعني انت دلوقتي عايش حياة مؤقتة و ماشي مقلق , هموت و انا نايم ولا اول ما اصحى .. هموت غرقان ولا حران ولا هموت من الهم ولا عربية هتشلني .. الفكرة مش هتموت ازاي , الفكرة انك هتموت و دي حاجة حلوة ! هتروح لحياة ابدية مش هتموت فيها تاني , و انت already عارف ان فيه 2 options يا جنة يا نار و ده بإختيارك انت و رحمة ربنا برضه بتعمل شغل ..
هتبقى مع ناس نضيفة و مفيش رغايين ولا فاسدين ولا نصابين .. كل حاجة هتبقى مثالية ده طبعا لو رحت الجنة و لو برضه النار ما انت هتقعد مع الناس اللي شبهك اللي عملت نفس الحاجات اللي انت عملتها غلط في حياتك و ده شئ كويس لأننا دايما بنعاني في الدنيا اننا مش لاقيين حد يفهمنا ...
الخوف من الموت هو عباطة يعني .. خايف تموت ليه ؟ خايف متشفش اصحابك و اهلك تاني ؟ هتشوف ناس احسن و ممكن اهلك يبقوا معاك .. هو انا فعلا بفكر في حاجات غريبة , يعني انا هلاقيهم ازاي ؟ الدنيا هتبقى زحمة ده اولا .. ثانيا افرض تهنا من بعض حلني بقى لو لقينا بعض .. ثالثا هيشفوني كدة سلط ملط ! اكيد ليها حل يعني و بعدين محدش هيبقى فاضي يبص عالتاني .. رابعا الدنيا هتبقى حر يوميها و انا بفرهد بسرعة من الحر و مبستحملش انا كتير خامسا و ده مهم : هو فوق هيبقى فيه نت و كدة مش للتواصل مع الاحياء يعني لأ مع اللي ماتوا برضه و انت فين و في جنة كام و اجيلك ازاي و كدة .. سادسا : هستنى كتير اوي عشان اتحاسب .. عقبال ما كل واحد في الدنيا دي ربنا سبحانه و تعالى يحاسبه و متعرفش بقى كل واحد هيبقى معاه رقم ولا بحروف الابجدية ولا ايه ... ممكن ناس كتير تكون فاكراني بستهزأ و بتريق و تقولولي حرام و كدة لكن و الله انا بتكلم بجد كل دي حاجات بتيجي في دماغي لما بفكر في الحياة بعد كدة و يوم القيامة تحديدا .. طب هل هتبقى هي هي نفس الحاجات اللي هنا هي هي اللي فوق ولا ايه بالظبط .. عموما يارب يجعل يومي قبل يوم اي حد بحبه مش عشان حاجة بس عشان مش عايزة اعيط ولا حد يوحشني انا اروح و انتو تحصلوني و لو عرفت اقلكم ايه اللي فوق او تحت هقولكم مش هبخل على حد .. نحن السابقون و انتم اللاحقون !
i really likeee .. عجبتني جدا الحتة بتاعت حتى لو دخلت النار هتلاقي الناس اللي شبهك ويفهموك .. بس عندي ملاحظة بسيطة على كلمة رحمة ربنا بتعمل شغل .. الحقيقة إن الرسول قال إن كل إنسان بيدخل الجنة برحمة ربنا مش بعمله حتى الرسول نفسه .. لإنك مهما عملتي مش هتكفي شكر نعمة واحدة بس من نعم ربنا .. بس عجبتني الـ Note فعلا
ReplyDeleteاكيد انا كان قصدي كل واحد بعمله و اكيد ربنا اللي بيساعد ان كل واحد يدخل الجنة او النار .. بس بغض النظر عن كل ده , مبسوطة انها عجبتك :)
ReplyDeleteبالظبط .ز والموت رحمة فعلا ونعمة في أوقات كتير .. تعب للأهل بس رحمة للميت فعلا .. أنا دايما كنت بقول كده لنفسي أما أمي الله يرحمها ماتت
ReplyDeleteالله يرحمها و يغفرلها يا رب إن شاء الله
ReplyDeleteدي بقا اللي بيسموها نووت من القلب...بدون حواجز بدون عقد ولا تفصيل كلام
ReplyDeleteبس يفضل الموت بردو يخوف ... رحلة من مكان وبيت واهل واصحاب وشغل وحاجات كتير اوي عايشنها واتعودنا عليها لمكان تاني محدش يعرف عنه حاجة
حتى اللي نعرفه بيخلينا نعمل زي ماانتي عملتي كده..اسئلة اسئلة اسئلة
بس اهو جاي جاي...المشكلة ان في زمننا ده الايام بقت تجري بسرعة والواحد مبقاش لاحق :):)
نووت جميلة يا ميرنا..عجبتني تلقائيتها اوي
تحياتي
محمد سمير
محمد سمر :) شكراااا ... انا متأكدة ان ناس كتير بتسأل الاسئلة دي كل يوم مثلا و محدش بيفكر يتكلم فيها عشان حاجز الدين اللي دايما مجتمعنا عايش فيه :) .. شكرا جدا !
ReplyDeleteانا فكرت في الحجات دي كتير و لسة بفكر فيها بعد ما فقدت أبويا الله يرحمه و كل ما أفكر فيها دماغي تنفجر.. عموما هو فعلا الموضوع مش مخيف أوي.. ربنا يصبرك و يجعلك من أهل الجنة..:)
ReplyDeleteو انا كمان بفكر فيها كتير ... الله يرحمه و يغفرله و يدخله فسيح جناته .. اما انا بقى ف متعشمة في رحمة ربنا :D ربنا يسترها علينا جميعا :)
ReplyDeleteawesomeeeeeeeeeeeeeeeeeee :) da msh kalam 3ady katbah dy philosophy <3 <3
ReplyDelete