Saturday, June 27, 2015

جدا جدا

غريب جدا إنك لما بتحس بحاجة بتقرر ماتصدقش إحساسك، والأغرب ان لما بتقرر تصدق رأي وإحساس شخص تاني، وغريب جدا ومحبط لو إحساسك طلع غلط مرة عشان ده بيضعف فرصة انك تصدق إحساسك تاني.. هو موضوع الإحساس ده غريب عامة،

ساعات بقعد افكر في الأحاسيس اللي احنا عارفينها زي الحب والاشتياق والكره، ما يمكن مش هي دي زي ما بنحسها فعلا، يعني لما بحب حد اوي بقعد افكر هل أنا بحبه فعلا؟ وإيه مصدر معرفتي بشعور الحب ده؟ الأغاني اللي لقنتنا سطمبة معينة ولا الأفلام اللي علمتنا اننا لازم الحب يبقى بشكل معين وأي حاجة تانية غريبة؟ ليه لازم كلنا نحب بنفس الشكل والتعبير؟

على أد ما انا لسه تايهة على أد ما الفضفضة دي إدتني براح غريب وشعور بالراحة خلى إحساس التوهان ده ياخد راحته، على الأقل مبقتش عايزة اخبط دماغي في الحيط وأكسرها من كتر التفكير..

اللي إتأكدت منه الايام اللي فاتت إني بحب الكتابة جدا، وبحب شعور الراحة والإبتسامة الصغيرة اللي بتترسم على وشي بعد ما أكتب أي حاجة، بحس إني موجودة فعلا..

مبقاش عندي إحساس الرهبة من التغيير وده شئ مبسوطة منه جدا، وبقيت مأهلة نفسي ان ممكن التغيير يطلع زي الخرة وأغير لحاجة تانية وهكذا..

انا فيا عيوب كتير جدا ومتقبلاها ومش حاسة بالذنب ناحيتها، عارفة ان لو حد عرفها هتضايقه جدا بس أنا عمري ما بعمل حاجة عشان اضايق بيها حد، بعملها لمجرد اني عايزة أعملها وهي غلط وأنا متصالحة مع ده..

أنا بقيت بتأمل كل يوم قبل ما أنام وبفضي دماغي زي بتوع اليوجا والحاجات دي، ماعملتليش أي إختلاف لحد دلوقتي بس لسه بعملها برضه.

3 comments:

  1. I can feel you're passion for every word you wrote, I love that !

    ReplyDelete
  2. ساعات كتير الواحد بيمر باشخاص جميله كدا و مفيهاش حاجه غلط بيبقي بيسأل نفسه ليه الواحد مش بيحب الأشخاص دي ليه دائماً بيبقي حظه ان هوا يقع في الأشخاص المش كويسه مش عارف ليه فعلن و ليه دائماً الانسان مش مرتاح و حاسس انه دائماً ناقصه حاجه و الشعور دا دائماً بيخليه ياما يروح لحاجه اسواء من الهوا كان فيه نتيجه عدم الارتياح ،،،شكرًا

    ReplyDelete
  3. ساعات كتير الواحد بيمر باشخاص جميله كدا و مفيهاش حاجه غلط بيبقي بيسأل نفسه ليه الواحد مش بيحب الأشخاص دي ليه دائماً بيبقي حظه ان هوا يقع في الأشخاص المش كويسه مش عارف ليه فعلن و ليه دائماً الانسان مش مرتاح و حاسس انه دائماً ناقصه حاجه و الشعور دا دائماً بيخليه ياما يروح لحاجه اسواء من الهوا كان فيه نتيجه عدم الارتياح ،،،شكرًا

    ReplyDelete