"كيف تجهز ناخبيك فور ديموقراصى" للمبتدئين

نحن مقبلون على انتخابات رئاسية فى غضون ايام قليلة، أنت تعلم جيدا ماذا تعنى الإنتخابات فى مصر، يعنى كل واحد بيقطّع فى التانى، الكل متحفز لأى إنتقاد من قريب او من بعيد لمرشحه الذى يؤمن به كثيرا بشكل مثير للدهشة فالأشخاص دائما هم أول من يتلونون ويتغيرون ويتحسر فى النهاية من عصر الليمون ومن حصرنا فى إختيارات ليست بالمنتظرة.. ما علينا مش مشكلتنا التحليلات دى دلوقتى، بما أننا "نوت ريدى فور ديموقراصى" كما قالوا لنا، قررت ان اكون إيجابية وأقدم بعض الإقتراحات التى ربما تروق للبعض وربما يمزق البعض الاخر الصفحة فى رحلتنا للبحث عن الديموقراصى.. 

1-    فلنبدأ من الخيط الأول وهو إذا كنت تريد وتنتبه لوجود إنتخابات أصلا! ودى مشكلة عميقة أكتر من اللازم، معظم الناس لو عدّى عليهم أربع سنين ومحدش قال لهم إن المفروض يبقى فيه إنتخابات لن يأبهوا أصلا.. الحل هو "تغفيلهم"، بمعنى ان يأتى رئيس بإنتخابات ثم يكسر مدة الأربع سنوات ونقف لنرى من سينتبه، وهو بالتأكيد من سيكون لهم حق المشاركة الفعلية فى أية إنتخابات مقبلة.

2-    أن يكون حق التصويت فى الإنتخابات لكل من بين 21 إلى 55 سنة، أكتر من كده ياريت يشرفنا فى مكتب الإستعلامات للأهمية، لأ بجد، كل من هم فوق الخمسين عاما يستطيعون المساعدة فى إنجاح العملية الإنتخابية وتوعية الشباب بإهمية المشاركة.. أصل حضرتك كفاية عليك الماضى والحاضر اللى إخترتهم، المستقبل اللى جاى مش ليك، هى مش شوكولاتة أصلها، سيب مَن مِن شأنهم التخطيط لمستقبلهم إختيار الأفضل لهم!

3-    أن يتم عمل  IQ Test اى إختبار للذكاء للناخبين المسجلين فى شكل إستفتاء قبل الإنتخابات الرئاسية او البرلمانية.. وكل اللى مش هينزل يشارك ويحل إختبار الذكاء ده سيتم معاقبته إما بغرامة مالية كبيرة جدًا لدرجة تخيف كل من يفكر فى عدم المشارك أو بالسجن لفترة معينة.. طبعًا مش محتاجة أقول ان فى إختبار الذكاء ده هنشوف مهازل، خاصة فى نتائج من يدعون الحكمة والعقل الآن وسيكون درسا قاسيا لكل الشعب اللى مابيرضاش على نفسه يقول "مش عارف" أو "مش فاهم". ومن خلال تلك النتائج، كل من تتجاوز نتيجته حد معين سيكون له حق المشاركة فى اية إنتخابات مقبلة، الباقيين هنشوف لهم خدمة إجتماعية تعويضا عن صوتهم الإنتخابى. وكل من يريد من الخاسرين المشاركة فى الإنتخابات، عليه ان يستخدم عقله ويقرأ ويذاكر حتى ينجح فى إختبار الذكاء.

4-    بعد إعلان وقت الإنتخابات وإعلان كافة المرشحين لها، تنتظر الدولة مدة لا تزيد عن 72 ساعة، ثم تنزل إلى الشوارع فتجد لافتات "الحاج محمد أحمد فرغلى يؤيد ويبايع المرشح فلان الفلانى"، ها قد بدأ المتملقون تملقهم، الدرس الحقيقى لهؤلاء الذين قرروا تملق المرشح اللى لسه مابقاش رئيس ان يتم الحجز على أعمالهم والقبض عليهم لفترة معينة ثم إخلاء سبيلهم، عشان بس يتعلموا مايبدأوش إنبطاح بدرى كده!!

5-    بعد إعلان موعد الإنتخابات، يتم إستيراد قوة بشرية من ثلاثة دول: "الصين، اليابان، كوريا"، هم من سيقومون بالوقوف فى اللجان مكان القضاة والمسئولين عن صناديق الإقتراع، إحنا شعب مقتنع إن يخلق من الشبه أربعين، أكيد اللى بيحاول يرشى المسئول عن لجنة ما لتزوير النتيجة مش هيعرف يطلعهم من بعض لو كلهم نفس الملامح.. أه ونديهم كورسات مكثفة للغة العربية عشان مايحتاجوش لوسيط بينهم وبين الناخب أصلا.

6-    قبل دخول كل ناخب اللجنة، عليه ان يسرد لشخص ما على الباب "يفضل ألا يكون مصرى" الأسباب التى دعته لإنتخاب هذا المرشح دونا عن غيره، اي اسباب من نوعية "ده حامى البلاد" أو "مرشح الفقراء" لن تجعل الناخب يمر من باب اللجنة بالتأكيد.

7-    فى ورقة الإنتخاب يجب عمل جزء فيها إجبارى، يناقش فيه الناخب برنامج مرشحه مثل، علل: إختيارك للمرشح فلان الفلانى؟ بم تفسر قول المرشح العلّانى كذا كذا؟ على أن يتم تصحيح تلك الأوراق من قبل متخصصين.

8-    ألا تكون أيام الإنتخابات أجازة رسمية، الناخب يذهب للعمل صباحا، يتغذى، ينام ساعتين، ينزل يصوّت ويطلع يحلّى وياكل بطيخ ساقع وينام.

9-    يجب ان يعرف الناخب ان محدش بيحب اوى إلا لما ينجرح اوى، لا تضع آمالا كبيرة على مرشحك، وذلك بإعطاء كورسات إجبارية للناخبين لتعليمهم عدم وضع آمال وأحلام وتجهيزهم أنه من الممكن ان يغدر بهم ناخبهم فى أى وقت.

أن يحترم الناخب نفسه.. ان يحترم بلده، ان يعلم ان ليس عبدًا إلا لله، وأن يفهم ان هذا المرشح سوف يأتى حتى يهتم بالشئون اللى الناخب معندوش وقت ياخد باله منها، المرشح هو موظف، المرشح هو يساعدك فى دفع البلد للأمام.