تبيع ؟ ابيع يا باشا ...دايما أمي لما كنت بسألها عن رأيها في شخص معين ساعات كانت بترد رد لطيف اوي بيلم الليلة كلها , بتقولي " ده راجل ساندوتش" ف انا مكنتش فاهمة ساعتها يعني إيه بس فهمت و انا هقولكم دلوقتي و هتفهموا...
انا مش فاهمة ناس كتيرة مصدومة من موقف البابا شنودة ليه ؟ إحنا لو بصينا على مواقف رجال الدين هنلاقيها كلها مخزية و ده الطبيعي لأنهم بيمثلوا ثقافة ماشي بيها جزء كبير اوي من الشعب " قلت جزء اهو بدل معظم عشان محدش يزعل يا ولاد " .. الا و هي ثقافة السندوتش
ثقافة السندوتش بتتلخص في مين اللي هيقدر يأكلني و يحافظ عليا و على مصالحي .. ماليش دعوة بمبادئ ولا اي عك من الحاجات دي .. مبادئ إيه و انا فاضيلكو انتو يا بتوع المبادئ .. دايما بتلاقيها و الله في الافلام يعرضوا على البت المزة انها تبقى رقاصة في الكباريه " هشتغل فتاحة يا بابا " و هي تقولهم رقاصة اه لكن اكتر من كدة لأ شرفي لأ يروح الراجل المقرص " اه قاصدة اكتبها بالقاف عشان عيب
" يقولها خلي الشرف و المبادئ ينفعوكي ..
" يقولها خلي الشرف و المبادئ ينفعوكي ..
و ثقافة السندوتش دي في كل المجالات .. إديني ساندوتش و انا اعملك اللي انت عايزه .. يعني يجيبوا صحفي مثلا يدوله ساندوتش فراخ بانية من الغالي اللي بيحطوا عليه مايونيز و يقولوله الكلمتين اللي هيكتبهم و شكرا ..
يجيبوا البابا و يهمزوه بالساندوتش إياه و اشكر يا بابا الرئيس الجليل حسني مبارك .. حاضر هشكره .. إنسى يا بابا دم الشهداء .. حاضر اهم كدة كدة في الجنة برضه .. يا واد يا مؤمن ! إيه ده لأ دي مكانها غلط .. قصدي شاطر يا بابا انت كدة في الامان .
زي ما هتلاقي برضه اي حد كل اللي همه هأكل عيالي إزاي و هو عنده حق .. هيفكر فيمبادئ إيه و هو محتاج الساندوتش اللي يسند طوله طول اليوم ؟
إنه الساندوتش ذو المفعول السحري يا سادة .. و هيفضل الساندوتش مسيطر لحد ما الثورة ربنا ينتعها بالسلامة و تقوم و تشد حيلها و حتى ذلك الحين دعونا من الولولة... سيبك انت بقى من كل ده
تاخد قطمة ؟
الناس دى هتفضل طفسة و ممبتشبعش و خلاص الراجل بيخبص و عاوز يعيش اخر حياته ففى أمان و هى دى ثقافة دولة العواجيز
ReplyDeleteحاسبي على كلامك - موقف قداسة البابا نابع عن المرجعية الدينية و كلنا عارفين ان الكنيسة بعيدة كل البعد عن السياسة و احنا الكتاب بيقول عندنا بطريقة واضحة جدا "سمعتم أنه قيل: تحب قريبك وتُبغض عدوك. وأما أنا فأقول لكم: أحبوا أعداءكم باركوا لاعنيكم. أحسنوا إلى إلى مُبغضيكم، وصلوا لأجل الذين يسيئون إليكم ويطردونكم(مت 5: 43 ، 44)" فمتبقاش مستني رد فعل غير كدة من البابا عايز تثور و تهتف و هو ممنعكش تعمل ده - اعزل الدين المسيحي و البابا خالص خالص عن اللعبة السياسية علشان احنا دين تسامح معتقدنا الاول "الرب يقاتل عنكم و انتم تصمتون (خر 14:14)" - بلاش الاندفاع الثوري يخليك تقول كلام من غير ماتعقله .. الكنيسة و كيانها مالهاش رأي سياسي فعال في كيان الدولة مش لازم تستتنى موقف رئيسها لان رئيسها هايمشي على تعاليم الدين مش على مزاجك ولا مزاجي.. و في نفس الوقت ممنعش حد من التظاهر و الهتاف وانا اول واحد بيقول يسقط مجلس الخونة .. يسقط يسقط حكم العسكر
ReplyDeleteياريت القطمه تبقي وظيفه ميري
ReplyDeleteشعب جعان صحيح
ReplyDelete:D
البابا هو اللي دخل الدين في السياسة من اول ما قال و نشكر قوانتا المسلحة عشان الاستقرار و امن البلاد ... هو اللي دخل الدين في السياسة لما جاب مجلس العرر صف اول و نسى امهات الشهداء اللي المفروض يبقوا صف اول في مناسبة زي دي ... و بالنسبة انك بتقول ممنعش اي حد من التظاهر .. الشاب بيتر يوسف اللي هتف يسقط يسقط حكم العسكر بعد خطاب البابا امن الكنيسة ضربه هو و اللي معاه و كانوا هيسلموهم للجيش ... ضقفة للبابا و شيخ الازهر لاحسي بيادات العسكر !!
ReplyDeleteموقف مفتى الديار على جمعة كان مخزى جدا لما علق وصرح فى التليفون على حادثة قتل الشهيد عماد عفت ....موقف البابا مشابه بالضبط للاسف مواقفهم مش شجاعة ودى مشكلة الدين والسياسة
ReplyDeleteطول عمري احب الخطوط الحادة ... فا دايما الامر يكون .. اما .. او .. كلمة الدبلوماسية دي كلمة منمقة لكلمة "التعريض" لان في الاوقات اللي ذي دي اللي مبياخدش موقف بيكون حاجة من الاتنين .. يا اما مش فاهم حاجة خالص .. وده طبعا دلوقتي مش موجود ... يا اما عارف وعايز يسكت لسبب من الاتنين يا اما خايف .. يا اما فاهم انه كده بياخد الدبابير تحت جناحه ..
ReplyDeleteبس اساسا .. الموضوع مش مستحمل لحس احذية في وسط الزبط والشتا والسيول اللي احنا فيها دي
..في جملة جميلة جدا اتقالت من بداية الثورة اللي محدش راضي يعترف بيها دي.. الناس عاملة زي الزوجة اللي عارفة ان جوزها (الجيش) بيخونها بس مش عايزة تقلب عليه
.... مع انها ممكن تتطلق وتتجوز من حد تاني ..
احسن من جوزها الاولاني ويعيشها في نعيم .. وحتكون سعيدة معاه عشان هي اللي مختاراه
كلامك صحيح فعلاً
ReplyDeleteيارب نخلص بقه من ثقافة الساندوتش دي
احنا زهقنا..!
طبعا ثقافه الساندوتش هي ثقافه صح في البلد دي بس انا مختلف معاكي في ان البابا ماشي بسياسه الساندوتش لاالبابا بيخاف ياكل الساندوتش .. البابا ليست له مصلحه مع النظام لكن التكوين النفسي لمجمع الرهبان هو الخنوع وعدم الاكتراث بالاخرين والدليل انهم ممكن يسيبوا اهاليهم اللي ممكن تكون محتجالم اكثر من الدير ويروحوا يترهبنوا .. مشكله الكنيسه ان من يقود الكنيسه ناس لم تتعلم القيادة او تحمل المسئوليه وعندما تفشل يقلولك ربنا موجود
ReplyDelete