Friday, February 10, 2012

هذيان منتصف الليل


عارف لما يبقى حد وحشك اوي و لما تتصل بيه تندم إنك اتصلت اصلا ؟

عارف لما تاكل اكلة حلوة جدا تحس بيها انك مش عايز تاكل حاجة تانية بعديها عشان طعمها يفضل ف بقك و بليل بطنك توجعك و متبطلش ترجيع ؟

عارف لما تبقى شايف انك لو حاجة معينة حصلت هتبقى اسعد إنسان في الدنيا و لما تبذل مجهود خارق عشان تعملها و تتحقق تستخسر مجهودك ده عشان محستش انك اسعد إنسان في الدنيا ؟

عارف إحساس لما موبايلك يفصل في نص مكالمة مصيرية و تقعد تدور عالشاحن في البيت متلاقيهوش خالص لحد فين و فين تلاقيه في الفيشة اللي جنبك و انت مش واخد بالك ؟

عارف شعور إنك تبقى قاعد تتفرج على ماتش لفريقك اللي بقاله كتير مكسبش و اخيرا كسبان الفرقة تانية و ييجي فيكو جون ف اخر دقيقة في الوقت الضايع ؟

عارف لما تبقى قاعد بتمثل على شخص معين و تبررله انك مردتش ليه عالتليفون و بعدين تسرح فجأة و تقول لنفسك ليه مقولوش مش طايق أمك إيه المشكلة لما ماردش عليك يعني ؟

عارف لما تبقى حاسس إن الدنيا كلها جاية عليك و ان الناس كلها ضاغطينك و بعدين في لحظة معينة تكتشف إنك بتحور على نفسك عشان تعيش دور الحزين و مفيش مشاكل عويصة فعلا ؟

عارف لما تبقى مدفي تحت البطانية و بعدين تحس انك عايز تعمل بيبي و تضطر تقوم من السرير و كمان متلاقيش شبشب ف تمشي عالبلاط لحد الحمام ؟

عارف لما تعيش دور البطل الجامد اللي عمل حاجة خطيرة جدا و انت شايف بينك و بين نفسك إنك معملتش حاجة بس عشان ترضي ضميرك و غرورك و خلاص ؟

عارف لما تروح حتة هادية و قدامك بحر و الجو صافي و برضه متحسش بالصفاء النفسي اللي قالولك عليه ؟

عارف لما تبقى جعان و تقوم تسخن و تتكلم في التليفون عشان تضيع وقت لحد ما يسخن و بعديها بربع ساعة تدخل المطبخ تلاقي انك مولعتش البوتاجاز اصلا ؟


عارف لما تبقى متأخر عن ميعادك في البيت و محدش كلمك يزعق و يقولك تعالى فتقلق اكتر من هدوء ما قبل العاصفة ده  و تروح تلاقيهم سهرانين برة و يقولولك متستنناش كل انت و نام ؟

عارف لما تدخل تستحمى و المية السخنة متقطعش عليك ولا حاجة بس تبقى مقلق طول الوقت و انت تحت الدش إنها تقطع ؟

عارف لما تبقى فاضي و هتموت و تنزل و متلاقيش حد تنزل معاه ؟

عارف لما تبقى حاسس إن ربنا بيحبك اوي و انه سامعك اكتر  من سمعه لأولياء الله الصالحين رغم إنك مبتعملوش حاجات كتير من اللي طالبها منك ؟

عارف لما تبقى هتموت و تكتب و مش لاقي حاجة تكتبها فتكتب اي كلام يمكن تطلع بحاجة حلوة ؟ اهو ده بقى اللي انا عارفاه دلوقتي .

9 comments:

  1. تحفة تحفة تحفة تحفة

    ReplyDelete
  2. بلبل اللي رافع من معنوياتي دايما :)

    ReplyDelete
  3. معلش يا رامي لسة مبتدئة بقى :D

    ReplyDelete
  4. chapeau ^_^ , fe3lan e7sas 3'aby awy lama ab2a 3aiez akteb w mesh la2y kallam yetkatab . ba7ess en ana fady mn gowa betare2a bashe3a

    ReplyDelete
  5. عاجبني اوي انا اكتر حاجة
    الشخص اللي مش طايقه و مقولتلهوش ده
    و المية السخنة اللي مقلق تتقطع :D
    و احساس ان ربنا سامعني و بيحبني رغم اني مش بعمل كل حاجة طالبها مني :)
    حلوين جدا يا ميرنا

    ReplyDelete
  6. mirna bgd bravo 3likiiiii ana 3gbany kol el 7gat ely ktbaha bs d aktr wa7da 7setaha bsra7aa rabena ywf2ak..astmry

    ReplyDelete
  7. جميلة والله انا كنت مستمتع وانا باقراهاه

    ReplyDelete