Wednesday, February 22, 2012

نقطة دم

ملحوظة : هذا المقال غير متوفر و غير مفهوم لذوي العقول الغير المتفتحة .

الحقيقة إني بقيت بستعجب من اللي بيحصل حواليا في مجتمع انا عايشة فيه .. عايشة مع ناس متناقضة مع بعضها .. بيفكروا بشرع الله و هما بيخالفوه .. بيفكروا في حرية الرأي و هما اصلا ولاد كلب كلهم ف بعض مش بيحترموا اراء الاخرين .

بس انا كبنت في المجتمع ده زهقت و قرفت .. مش عشان انا مش واخدة حريتي , لكن عشان انا موضوعة تحت ميكروسكوب .. بتعمل إيه , راحت فين , ماشية مع مين . في حين ان الولاد محدش بيحطهم تحت ميكروسكوب , عايز ينزل يتفضل عايز يحشش اهو بيجرب عايز يقضيها مع البنات *و نفتح مخنا شوية و نوسع افاقنا في كلمة يقضيها* نضحك و نقول الواد كبر .

في حين ان مجتمعي العزيز , مبيفكرش فيا غير من ناحية نقطة الدم اللي بتنزل مني ليلة فرحي للدلالة على عذريتي ... لو نزلت ابقى انا كدة اهلي عرفوا يربوني لكن لو منزلتش يبقى غالبا هطلق و اهلي هيتبروا مني و يعزلوا و هغير إسمي و ممكن اعمل عملية تغيير جنس بالمرة و يبقى اسمي تامر .

ربنا سبحانه و تعالى لما نزلنا ايات عن الزاني و الزانية .. مقالش اصل الزاني محدش بيعرف هو عمل كدة ولا لأ لكن البنت متعملش كدة عشان غشاء بكارتها ,  عقاب الزاني هو هو عقاب الزانية .. عقابهم او جزائهم و سيئاتهم في الاخرة و في الدنيا برضه هو هو .. البنات مش بتتجلد اكتر من الولاد ... مع ان عقابهم في الدنيا يصعب جدا إثباته ه .

ماشي انا همشيها معاك انها عيلة فايقة و بتفكر , لما يعرفوا ان ابنهم عمل كدة هيهزقوه و عيب و حرام يابني .. لكن هل هو ده رد فعلهم لو بنتهم عملت كدة ؟ هيقولولها عيب و متعمليش كدة تاني عشان حرام ؟ ولا هتتضرب و مش هتنزل من البيت و تتحرم من الدراسة و يلبسوا اسود و شغل نحن لا نزرع الشوك   ده لحد ما يجيلها عدلها اللي برضه عدل مايل هيطلقها لما متنزلش نقطة الدم ... المشكلة ان نقطة الدم بقت مهمة اوي لدرجة ان ممكن ممكن بنات يبقوا عذراوات لكن عملوا كل حاجة في حياتهم و مع اي حد و محدش هيعرف ...

عقلنا في راسنا مش في مؤخراتنا ... العدل لا يتجزأ يا حلوين , زي ما بتعمل معايا عشان لو على كلامك عشان *ربنا* إعمل معاه هو كمان كدة و متخليهوش يتفاخر بإنه ماشي حيحان على نفسه , مثل حقه في زوجة عذراء فأيضا حقي في رجل بتول , مثل جزائي إذا ما فقدت عذريتي قبل الزواج من إهانة و  النظر إلي كمومس فأيضا حقي في تطبيق نفس النظرة و نفس الإهانة عليه ... نقطة الدم دي المفروض تبقى في غشاء فكرنا و ليس في غشاء بكارتنا ..

إلا من تابوا من بعد ذلك و اصلحوا فإن الله غفور رحيم *سورة النور*
Posted by at

13 comments:

  1. UnknownFebruary 23, 2012 at 1:14 AM

    أرفع القبعة.. لمن يعلم معنى الحقوق والحرية!

    ReplyDelete
  2. pola salemFebruary 23, 2012 at 1:31 AM

    اكثر من مجرد رائعة .......

    ReplyDelete
  3. modykazlakFebruary 23, 2012 at 1:56 AM

    to7aaaaa ....

    ReplyDelete
  4. nasrwattFebruary 23, 2012 at 4:31 AM

    رائع جدا بس انتى مقولتيش اى حلول اى تحليل لموقف او عرض لظاهرة بتوجب على صاحبه انه يقدم الحلول مش حنعد نلطم يعنى احنا كدة بنبحط بعض عاوز اعرف الحلول اللى ممكن تقدميها و خصوصافى اول فقرة و باقى الموضوع ككل

    ReplyDelete
  5. انا من العشوائيينFebruary 23, 2012 at 4:33 AM

    انا مصدوم ! من جرائتك فى مواجهة ذكوريتنا البغيضة

    ReplyDelete
  6. Mirna el HelbawiFebruary 23, 2012 at 4:39 AM

    @nasrwatt على فكرة مش مطلوب مني ككاتبة اني اقدم حلول ... انا مطلوب مني اني اثير مواضيع المجتمع غافل عنها عشان الناس تلاقيلها حلول و تاخد بالها منها و إني بوعيهم بطريقة غير مباشرة :)بس ممكن نبتدي بتغيير نظرتنا للبنت او الولد .. هتفرق كتير .. البنت بيربوها ان الولد ده عوو و هي فريسة هيهجم عليها فهو كائن لاوم تتجنبه و الولد بيعلموه ان البنت هي اداة لإثارة شهوته الجنسية و بس .

    ReplyDelete
    Replies
    1. nasrwattFebruary 23, 2012 at 5:04 AM

      هو مش فرض على الكاتب بس مينفعش اسيب القارئ حيران لازم اقدم الحلول او حتى طرف الخيط عشان منسيبش القراء محتاسين للاسف كلامك صح جدا بس مش فى مصر لانك المجتمع بتاعك منغلق جدا فى حته العادات و التقاليد و دى انا بعانى منها زيك بالظبط ( بس مش فى نفس الموضوع انا بعانى منها فى حته الدكتاتورية للام او الاب و انا تجردت من الموضوع دة و الدليل انى فعت قضية على خالى لما حاول يتعدى عليا .
      و كمان المشكلة الكبيرة اننا كنا ممكن نحاول نعمل زا ما قلت فى النشئ الجديد بس لو كان شباب الثورة هو الى حكم بس للاسف ان الل حيحكم ناس ناس العادات مهمة جدا ب.
      يعنى لو روحتى لواحد سلفى او اخوانى و كلمتيه فى الموضوع المهم اللى بتتكلمى فيه السلفى حيسيبك و حيبصلك من تحت لفوق و يمشى اما الاخوانى حيسخر من كلامك بس لو احنا فى دولة بتحترم الاراء كان الموقف مختلف احنا نشتغل عبر مراكذ الثقافة و اننا ننزل نثقف الناس فى الشارع هو دة الحل

      Delete
  7. m.elhelbawiFebruary 23, 2012 at 6:49 AM

    eeh elaaraff da....enti elle betektebi elkalam da ya mirna...
    da kalam zebala mish kalam kateb mohteram...3shaan elle 3aiiz yehazaa nafso me3 elnass yekteb elzebala de...
    ana kont faker enk ensana mohtarama ya mirna...mish betekteb zebala...eeh elaaraff elle betektebeeh da...!!!

    khalo..

    ReplyDelete
  8. Mirna el HelbawiFebruary 23, 2012 at 7:24 AM

    خالي العزيز :) انا مش شايفة ان اثارتي لمشكلة من مشكلات مجتمعي و هي إزدواجيته و سطحي تبقى قرف و زبالة العكس :) إزدواجية المجتمع و سطحيته و عدم اعترافه إخطائه هي من اسباب تخلفنا .. و انا في مقالي هذا بتكلم عن الاحترام و إزاي لازم منجزأش الخطأ .. الغلط غلط لا فصال فيه :) اما عن احترام الناس ليا ف الحمد لله بيزيد يوم عن اللي قبله ... اما عن إحترامك لي و لكلامي فأجده مختفيا وسط تعليقك :) و هذا لا يزعجني إطلاقا ... شكرا خالي العزيز لإهتمامك بكتاباتي :)

    ReplyDelete
  9. muhammed srourFebruary 23, 2012 at 3:38 PM

    احنا مجتمع الشيزوفرينيا بتاعته عاليه اوى..,احنا اللى بنختار مرشحينا على اساس الدين طمعا فى الجنه وفى نفس الوقت مش بنطبق اى حاجه منه..البنت فى مجتمعنا عمرها ما هتحرر طول ما افكارنا دى موجوده والافكار دى عشان تتغير لازم ثورة تانية ووقت طويل

    ReplyDelete
  10. كرابنتسFebruary 24, 2012 at 12:22 AM

    رائعة و صااااادمة
    هو دة حال المجتمع من سنين طويلة الازدواجية و انفصام الشخصية اللى عايشينة
    و اللى عاوزة تغلط بتتأقلم مع التفكير الغير سوى و بتظبط امورها
    موقفنا من البنت مش غلط موقفنا من التعامل مع الولد هو الغلط بعينه
    احنا كبشر مابنتحركش غير لما تقرب النار مننا و لان الولد غير البنت فسيولوجيا مش هايظهر عليه اعراض الزنا و الا هايحمل فلذلك لا نعتبرها مشكله
    ممكن تحصل معجزة و الراجل يحمل من الزنا ساعتها ممكن الناس تتعامل بالمثل

    ReplyDelete
  11. Ahmed SalabyFebruary 24, 2012 at 11:33 PM

    موضوع في حد ذاته والرسالة اللي عايز يوصلها كويس بس الفكرة اللي للاسف مش بناخد بالنا منها إنه ممكن يظهر في صورة احسن من كده لو إنتي فعلا عايزة توصلي الفكرة المجردة من الموضوع ده متخليش الناس تاخد عليكي ملحوظات إنتي في غنى عنها تماما

    ReplyDelete
  12. moroMarch 2, 2012 at 5:08 AM

    وليس الذكر كا الانثى
    الموضوع تافه وملوش اى قيمه وان دل قيدل على شذوذ كاتبه وعدم ثقافته لان الموضوع قتل بحثا من ذى قبل وفيه اراء فاصله
    اتعبوا نفسكو واقروا شويه قبل ما تخرفوا اى تخريف
    وشكرا

    ReplyDelete

Subscribe to: Post Comments (Atom)