عدوا هوا .. محستش بيهم مش عارفة ليه , بس فاكرة كل حاجة حصلت في الاتناشر سنة دول .
بس اللي فاكراه اوي و متأكدة منه إنه مكنش موجود تقريبا في حياتي .. لأ كان موجود بس دايما بطريقة سلبية ... اصلا انا مش مستوعبة فكرة هو مين ولا إيه دوره ولا هو المفروض بيعمل إيه في حياة البني ادمين التانيين .
بستغرب اوي من الكلمة لما حد من صاحباتي تقولي كان معايا و رحنا وكدة .. عمري ما إضايقت بس كنت بستغرب , إيه ده هو يعني إيه الكائن ده ؟ و بيتعامل عادي معاكو و مش بيعملك مشاكل وكدة ؟ غريبة .
مبتكلمش عليه خالص .. لأ بجيب سيرته ساعات لما بتكون حصلت مشكلة بسببه كالعادة , برضه مش بضايق .. اصل انا مش عارفة إيه صلة القرابة بيني و بينه من اتناشر سنة , بس انا فاكرة اننا كنا قريبين شوية قبل الاتناشر سنة دول .. كنت بروح معاه الجيم و القهوة و الشغل و بعدين مبقتش بحسه .
بس انا فاكرة خلال الاتناشر سنة دول هي حاولت تقرب المسافات بس كل مرة برجع مٌحبَطة .. كل مرة كنت اقولها ليه بتحاولي تصلحي و انتي عارفة كويس انه مينفعش ؟ فاكرة كويس لما كنت ف اولى ثانوي و اغمى عليا من كتر العياط و صٌدِمت من كلامه , و جت هي تنقذني كعادتها ...
على فكرة حتى هو فقد إحساس القرابة اللي بيني و بينه .. و ده مش مضايقني على قد ما مستغرباله بس , على فكرة لما بييجي إسمه اصلا مش مثلا بزعل او كدة .. لأ كأن حد بيتكلم على حسن عبد الرحيم .. حسن عبد الرحيم ده إسم حد بس انا معرفوش هو مين .
أنا عارفة انه موجود و عايش حياته .. و أنا كمان عايشة حياتي , احسن اتناشر سنة عشتهم معاها , برغم المشاكل و التريبات اللي بتحصلنا علطول بس بنرجع نضحك اوي في الاخر .
فيها شيء بيشدني .. مش عارف أيه هو .. قريتها كذا مرة .. ومش قادر أحدده .. عاجبني أوي التشبيه بتاع "على فكرة لما بييجي إسمه اصلا مش مثلا بزعل او كدة .. لأ كأن حد بيتكلم على حسن عبد الرحيم .. حسن عبد الرحيم ده إسم حد بس انا معرفوش هو مين" التدوينة ككل عبقرية جداً وتعجبني .. باستثناء إني مش فاهم التفاصيل المملة للكتابة .. ويمكن ده أحلى ما فيها :)
ReplyDeleteI Get It :)
ReplyDeleteأحلى مافيها مافيهاش تفاصيل
ReplyDeleteارجو تسجيل خروجى من البلوج الاهبل اوى ده
ReplyDelete