أمى

أمى ، معرفتش اجبلك هدية إيه بصراحة غير انى اعمل اللى بعمله ده.. اكتبلك اد إيه بحبك و اد إيه فخورة بيكى ف كل شئ في حياتي ، لولاكى- "مش لولا لولا"- مكنتش بقيت اللى انا فيه دلوقتى، 90% من نجاحى انتى سبب فيه ، 90% من اى شئ كويس عملته و بعمله و لسه هعمله انتى اللى شجعتينى اعمله -و مش كلام مبتذل بتاع اعياد الأم و الله بتكلم بجد- .. اي نعم ده ما يمنعش عدد المرات اللى احبطتيني فيهم بس لما بفكر بعرف ان كان عندك حق "بس ده مش معناه انك تفضلى تقوليلي لأ كتير ها"..

بفكر دايما لو بعد الشر حصلك حاجة انا ممكن يحصلى إيه، و مش بحب افكر كتير ف ده عشان مش هينفع تمشي و تسيبينى بأى حال من الاحوال.. مهو يا نعيش عيشة فل يا نموت إحنا الكل..

 كل ما ابص على الاتناشر سنة اللى فاتوا بتكبرى ف نظرى اكتر و بتشجعينى اكتر و بتقوينى اكتر و اكتر.. ، ببص عليكى و انتى بتتعاملى مع الناس و اد إيه شخصيتك قوية بيبقى نفسي ابقى انتى..

اي نعم انتى عصبية و ساعات بيبقى ردك مستفز خصوصا لما انفخ و تقوليلي الاية ولا تقل لهما افا بضايق اكتر  
و بتنرفز اكتر و يا سلام لما اكون متنرفزة و محزوقة و انتى بتضحكى بس بحبك برضه..

فاكرة لما كنت ف ابتدائى و علمتيني اقرا و كنا نروح بشوال شارع النبى دانيال نلم كتب اد كدة و اخلصهم ف يومين و اقولك عايزة اجيب كتب تاني

فاكرة لما كنت لازقة فيكى و انا صغيرة و خايفة من التعامل مع اي حد و شايفاكى انتى بس اللي امان و ينفع اتعامل معاكى

فاكرة لما نقعد نألس على حد مع بعض و انتى رايقة و نضحك جدا

فاكرة لما طلعت ف دماغك نروح الاقصر بالعربية! و خلتيني اعمل بيبي ف مركز شباب سوهاج

فاكرة لما مش بيبقى عندك مشكلة انى اتأخر شوية لو هجبلك لب و سوداني معايا

فاكرة لما علمتيني اعمل مكرونة.. و مكنتيش بتحبيها منى في الاول عشان دايما ناقصة حاجة

فاكرة لما بتنرفز و انا بكلمك و تبصيلي البصة اللي بتأنبلى ضميرى و اروح اصالحك

بحبك جدا.. و هتفضلى رقم واحد ف حياتى بس لو بطلتى تتكلمى في التليفون بصوت عالى و انا نايمة هحبك 
اكترJ

واخدة منك حاجات كتير اوى و بفرح لما حد بيقول انى شبهم او فيا من شخصيتك ، بش شكرا على اسوأ حاجة ف حياتى ورثتيهالى ، الجيوب الانفية