Saturday, June 8, 2013

عن بولا سالم


 إنهاردة اللى هو اليوم اللى بعد الساعة 12 ده يبقى عيد ميلاد بولا سالم، او محمد يوسف احمد سالم.. اكتر شخص بحبه فى حياتى واعز شخص على قلبى واحسن حد قابلته لحد دلوقتى..

كل سنة وإنت طيب يا بلبل.. معرفتش اجيبلك هدية إيه، مفيش بيننا هدايا، بس كان لازم اعملك حاجة ممكن تفرحك ولو واحد فى المية فى عيد ميلادك.. ومالقتش حاجة غير إنى اكتبلك، وإنت عارف انا بحب الكتابة اد إيه..

إنت ماتعرفش انا بحبك اد إيه، كفاية إنك عارف مين ميرنا وبتحبنى زى ما انا بعيوبى وبخرايا، كفاية إنك عارفنى وشفتنى من وانا قبل نقطة الصفر بكتير فشخ!

كفاية إنك اول واحد شجعتنى اكتب وزقتنى زق انى انشر حاجة من حاجتى للناس.. وادينى اهو بسببك الناس كلها بتقرالى.. لولاك كان زمانى لسه مش عارفة انا عايزة إيه ولا عارفة اعمل إيه.

إنت اللى علمتنى جملتنا الشهيرة "كـ* أم الناس".. النجمة دى عشان لو أمى قرت الكلام ده هتعلقنى انا وانت على باب العمارة من قفانا.

إنت اللى علمتنى اعمل اللى انا عايزاه ايا كان إيه هو مدام هبقى مبسوطة.. بتساندنى دايما فى اى حاجة بعملها واى قرار باخده لمجرد إنى مابقاش لوحدى فيه وبتبقى اول واحد يشتمنى عليه اول ما ازهق او اقرر إنى مش هعمله..
 
عارف إنى بفرحلك اكتر ما بفرح لنفسى؟ وعارف ان بقالنا 4 سنين مثلا كل يوم ليل نهار فى وش بعض وكل يوم نسأل هو إحنا هنزهق من بعض إمتى؟

لازم تعرف إنى فى ضهرك على طول مهما حصل، اللى ييجى عليك نجيبه فى شوال،
فاكر لما كنا قاعدين على القهوة فى الكوربة والست وهى نازلة من العربية بصتلى من فوق لتحت وقالت إيه الصياعة دى عليا؟ فاكر لما رحت انت قايم ولازقلها ورقة على الشباك عندها "خليكى فى حالك وماتبصيش على الناس يا ولية يا حيزبونة"؟

فاكر لما اتقبلت فى المجلة ورجعت اسكندرية وكنت مش شايفة قدامى واصريت اننا نحتفل فى سبيتفاير بالشغل الجديد؟ طب فاكر سرمحتنا فى الشوارع فى القاهرة لحد النهار ما يطلع قبل ما ابقى قاعدة فى الشقة بتاعت صلاح سالم؟

فاكر راس السنة اللى فاتت؟ واللى قبلها؟

يا دين أمى! لو حكيت المواقف اللى حصلتلنا مش هخلص من هنا لأسبوع جاى..

إنت من الحاجات الحلوة بجد اللى موجودة فى حياتى، كبرنا فشخ يا بلبل! بقيت إنت 25 وانا خلاص 21! وعارفة انك هتقول بعد ما تقرا الجملة دى اننا يادوب لازم نلبس احلى حاجة عندنا وننط من البلكونة.. نكدى!

كل سنة وإنت صديقى للأبد يا بلبل.. يا كاتم اسرارى، يا شاهد على كل خطوة بخطيها فى حياتى.

إنت أقرب ليا من مجرد مسمى "صديقى المقرب" واقرب ليا من اخويا.

5 comments:

  1. Friend-zoned :D ... 2alby ma3ak ya Pola :D

    ReplyDelete
  2. ويخليكوا لبعض ربنا مايحرمكوش من بعض

    ReplyDelete
  3. هي أمك هتزعل من النجمة بتاعة ك*م الناس لكن عادي بالنسبة لها انك سهرانة مع راجل للفجر في الشارع و انك رايحة سبيتفاير ...shit

    ReplyDelete
    Replies
    1. لا هو عادي بالنسبة لامك انها ربتك تتدخل وتنتقد في حياة الناس وشايف نفسك صح

      Delete